مشكله صار لها 8سنين ولا انحلت ..

[passposse]

السلام عليكم ورحمة الله وبركاته ..

اليوم عندي موضوع اتمنى انكم تحلونه لي من زمان للحين ما قدرت اني احله ..

عندي طير من نوعية مليكون كاكتو صار له عندي تقريبا 8 سنين .. اول ما يابوه لي كان يخاف وايد وما يخلي احد يقرب عنده كان عن اطفال فأظن عشان جذيه كان يخاف من اي حد ..

المهم كمل فتره والحمد لله صار عادي وتعود علينا وصرنا نطلعه ويانا يقعد ويانا ونمسح ريشه وياكل ويانا ..

ظل فترة تقريبا سنتين من دون مشاكل وعادي معانا .. وصار يعيش بغرفه خصصناها له ويقعد ويانا بالبيت من دون قفص خاص له وما كان يطير .. بس بعد فتره فجأه تغير وصار يخاف من كل شي تقريبا مرات يقرب منا او يخليني اقرب منه بس بشكل نادر جدا ..

وفي هل الفتره بدأنا نلاحظ انه ريشه شوي شوي بدأ يتنتف بس مثل اي طير ثاني عدنا ظنينا انه بيرجع ينموا يته فتره اوكي ..

لكن فجأه بعد فتريعني لاحظنا اغلب ريشه راح .. ما كنا نتوقع يصير جذيه قلنا ممكن يظهر له ريش لو عطيناه اكل زين .. بس ظلت المشكله لكنه الحمد لله صار يقرب منا ويقعد ويانا وياكل ..

لكن ريشه للحين يومنا هذا من 5 أو 6 سنين ما راضي يطلع .. حاولنا وديناه البيطري ما فاده شي الا تقرع ع الاخر .. حتى منقاره صار هب زين منعوج وواحد العلوي مقصوص لين نصه .. والسفلي يطول ونرجع نبرده له عشان يقدر ياكل ..

طبعا الي مربنه يعرف كيف يكون مرات مزعج وصريخه يهد المكان هد لكن تربيته حلوه وهو وايد ذكي وظريف .. لكن مشكلته في الصريخ ..

فلو سمحتوا اي حد ممكن يساعدني وياه لانه مو هاين علي يظل بهل حاله والله انه يظل يتنافض من البرد .. تعرفون كيف المكيفات في الصيف .. مشكلته انه وايد يخاف من كل شيء مرات بنص الليل يصارخ كانه حد قاعد يكفخه بشيء طبعا ما يحب الحشرات مثل الذباب يسويلنا بالبيت حفله اذا شاف وحده .. وما اخفي عليكم عندي بالبيت بعد قطاو ممكن انه يخاف مسوين فيه شي بس هو من يصرخ او يبدأ صراخ يهجون عن المكان الي هو فيه ..

الله يعينا وياه .. واسمحولي اذا طولت عليكم بالقصه .. وتسلمون ..

سلاماتو ..

[Mr. MeMo]

اخي العزيز


بخصوص الصراخ فهو شي طبيعي مع الكوكاتو
فصرخاته هي اهم عيوبه اما بخصوص صراخه
ليلا فالكوكاتو يخاف الظلمه ارجو منك و ضع
نور خافت له بالليل

اما بخصوص الريش و نتفه له سببين
الاول
حاله مرضيه في الجلد
فهل قمت بمراجعه البيطري ؟
والثانيه
حاله نفسيه
فهل وضعت له اللعاب او اغصان شجر في القفص؟

واليك هذه الصوره فهل وصل الحال لهذا الشكل؟



هل حاولت استخدام الطوق كما في الصوره التاليه اذا
طائرك هو من يقوم بنتف الريش ؟



ارجو منك الاجابه علي الاسئله لكي نستطيع افادتك
واتمني لك التوفيق

[فطوم]

طبعا مستر ميمو القميل اكبر خبير وخطير بالمنتدى ماشاءالله عليه ماراح يقصر معاج بس انا بقولج قصه عم امي...

عم امي كان عنده كاسكو مدلل لمده 10 سنين يمكن والكاسكو بدا يطيع ريشه جرب معا كل شي لدرجه انه وداه السعوديه وكذا دوله عربيه يعالجونه من كثر مايحبه (وقتها مااكن فيه اطبه بيطريه بالكويت نفس الحين) وظل الكاسكو على نفس الحاله وبصراحه مادري هل اهو كان ينتف ريشه او ريشه بروحه يطيح...

المهم يوم من الأيام حفيد عم امي طلع الكاسكو من القفص والولد صغير قاعد يلعب مع الكاسكو واضاهر الولد انحصر وبال عالكاسكو وهو بالحمام ومن يومها طلع حق الكاسكو ريش بعد 3 سنين من المشكله!!!

انا مادري شنو السبب لكن اعتقد البول يكوي الجسم مما يقتل مسببات هذي الحساسيه

فنصيحتي لج حاولي تجلبينله بول ناقه وتسبحينه بماء البحر وانشاءالله يفيدونج لانه انا الكاسكو مالتي كانت نفس المشكله وديتها البيطري وعطاها فيتامينات وابره لكن ماكو فايده لين قمت اسبها بماء البحر او ماء مع بيكربونات الصوديوم

[عاشق الحيوانات]

فطوم كان عندي نفس المشكله حطيت بوول ناقه بس ماكو فايدة جان يقول البيطري لفة بقصدير ودخله الفرن مع شوية باشميل
وحطيته بس حت ريش راسه وكنت بوديه لبنان اسويلة زراعة بس صارت الحرب الحين احتمال اسقيه سبرايت :d

[فطوم]

عاشق الحيوان انت مجرم شلون تسويه بشمل!!!!!
بس انا احب بشمل الدياي

تطنز ها
والله السالــــــــفه صج والله ليش اجذب يعني
بعدين بول الناقه معروف ومذكور بالطب النبوي

[FAWAZ]

حياك الله أخوي الغالي وسعيد بمشاركتك المشكلة معنا

فيه يا أخوي أسئلة واجد في بالي عن مشكلتك لأنها مشكله مو سهلة الحل بصراحه

لي تعليق بسيط ...
أحب أقول وني سبق وربيت هذا النوع ومو طير واحد عدة طيور منه في أعمار مختلفه
الطير هذا مناعته قويه جدا ضد الأمراض , إلا أنه حساس بزياده فأي موقف يصير معه يمكن يأدي فيه إلى الحاله إلى أنت ذكرتها
مثلا .... احد خوفه , أحد ضربه تذكر وراجع كل موقف مر فيه يمكن يكون سبب
حاجه ثانيه وظن انها سبب رئيسي بعد ... هي حاجة ورغبة الطير في التكاثر وهو معروف إنه أسهل طير في التكاثر , منعه من الحاجه هذي تسبب له مرض عضوي ونفسي بعد يؤدي فيه إلى قلع ريشه أو سقوطه لوحده , وتصير الحالة هذي غالبا إذا تقدم بالعمر
شي ثاني وهو مرض عضوي يصيبه يؤدي فيه إلى الحالة هذي

طيور الكوكاتوه طيبه لاكنها عنيدة جدا جدا فيجب الصبر معها والمداومه على العلاج

وذا بتكلم عنها كمشكله صارت لي .. فأنا تعبت وحترت وكل واحد يقول لي راي ويعطيني علاج دون أي فايده
بدايه المشكله زي ماقلت طيري يصفف ريشه أكثر من اللازم ولاحظه بدا يصير زي الأعواد مدري اذا الشي ذا صار معك وبعدها قام يسقط وحده ورا الثانيه ونا أتفرج مدري وش أسوي بعد ماتعبت من إعطائه كل علاج
عمر طيري كان 6 سنوات أليف جدا ملوكان كوكاتو ذكر
والحل كان غريب جدا ومحد يتصوره جبت له أنثى من نفس نوعه مع إنها متوحشه ومدري كم عمرها وسبحان الله تغيرت حالته وبدا يتعدل ريشة وصحته تحسنت وكلها كم شهر وريشه كله طالع
حاولت اني اكاثرهم من دون أي فايده


أعتذر عن الإطاله
لاكن حبيت أعطيك تجربه لي مع نفس الموقف الي حصل لك
ولي عوده إلى موضوعك إذا أفدتنا بمعلومات أكثر
أخوك فواز ,,,

[عاشق الحيوانات]

فطوم مذكور بالطب النبوي حق الشرب مفيد للانسان بس تكبينه على الطير

[passposse]

السلام عليكم ..

فهل قمت بمراجعه البيطري ؟

نعم اخوي بس من دون فايده ..

فهل وضعت له اللعاب او اغصان شجر في القفص؟

من ناحية الالعاب ايوا تقريبا كل شي مايخاف منه .. وهو ما يعيش في قفص خاص له فقط غرفه خاصه له والي يجلس عليه عباره عن حديد موب خشب ..

واذا وصلت حالته نفس الي بالصوره فأقولك للاسف اسوأ من جذيه كل الريش تساقط من راسه لين رجوله ..

من ناحية انه اذا كان ينتف ريشه بنفسه فهذا الشيء مو متأكده منه ..

وتسلم وايد اخوي Mr. MeMo ع الرد .. والله يعطيك العافيه اتمنى اجوبتي تساعد في التشخيص ..

سلاماتو ..

[passposse]

السلام عليكم ..

تسلمين اختي فطوم ع القصه الي اثمرت وصار للكاسكو ريش بعد عناء ..

وانا بحاول اني اجرب اذا يصير اني اوفر هل شيء بس انتي قلتي اسبحه بماي البحر ممكن يفيد بروحه ولا لازم استخدم بول الناقه معاه .. ووين ممكن احصل هذي بيكربونات الصوديوم .. وبحاول وبإذن الله تنحل المشكله ..

الله يعطيج العافيه .. سلاماتو ..

[passposse]

السلام عليكم ..

هلا اخوي عاشق الحيوانات مشكور ع الحضور الطيب ..

اذا يصير الحين انه في علاجات الانسان وداخل في الطب النبوي .. ليش ما نجرب ع الطير ممكن يساعده ويتعافى .. سبحان الله لخلقه شؤون ..

وتسلمون كلكم .. سلاماتو ..