اريد حل من اهل الخبره؟؟

[Love kasko]

بسم الله الرحمن الرحيم

السلام عليكم ورحمة الله وبركاته

شحالكم..وشخباركم؟؟

امس رحت الشارقه اريد اخذ كاسكو المهم ما عجبني شي ولا شي دخل في بالي بس حبيت بلوفرنتد وما طاع يبايعني ايه الا ب 8000 الف درهم مع انه وحشي وما طاع ينزل ولا درهم المهم وانا الف شفت هندي يدور بهذي الدره قلت له كم عمرها قال 3شهور نفس عمر توته المهم كنت ما اريد اخذها بس كسرت خاطري الهندي السبال كان يجرح منقارها بموس اونه عشان ما تعض قهرني جان اقوله لا تسوي فيها شي واريدها وخذيتها ب 100 درهم المهم هذي صورتها



وديتها البيطري قال لي صحتها عال العال كيف اتعامل معها امس كنت هاديه وما تعض وعلى ايدي طول الطريق رجعنا حطيتها في قفص بس صار الصبح صارت وحده ثانيه متوحشه وتعض وما طاعت تاكل حب ابداً حطيت لها تفاحه كلتها كامل ما شاء الله وغيره ماشي الحين رحمتها حطيت لها كمثرى كلتها

كيف اتعامل معها؟؟وشو اعطيها تاكل غير الحب والفواكهه؟؟

والاهم والمهم من قامت توته وشافتها جنت بس تريد تطلع تضاربها مع اني ابدا ما عطيت الجديده وجه قدامها وهيه في قفص ملكه والجديده في قفص

وخذو جديدها هذا هو





انصدمت اول مره توته تاكل الخشب بهذي الطريقه اكلمها مطنشه وتكمل ومعصبه ليش؟؟

وثاني شي اول مره توته تعضني عضه قويه وما تريدني اليوم ما اجت على كتفي بس طلعتها على الكرسي والحين فوق اللاب توب؟؟اذا الحل انه الجديد ما يكون موجود عادي اوديه اي مكان بس ترجه توته زي قبل

واي شي نصيحه تفيدني لا تبخلون علي فيها

ودي واحترامي للجميع

اختكم

قمر

[فيوزي]

اخوي توته متعلقه فيك وتغار يعني غيوره ما تبي الجديده
وخرها من عندها حط الجديده في مكان ثاني

ومن نلحيه تعض وصارت متوحشه شئ طبيعي لانها جديده اصبر لها كم يوم ان شاء الله ترجع زي ما كانت
والدره مزاجيه يعني اليوم زبوطه بكره متوحشه اليوم تلعب بكره ما تلعب اليوم ما تعض بكرا تعض وعلى كذا
وراح يفيدونك الاخوان
تحياتي
ابو سدران

[Love kasko]

ان شاء الله يا اخوي ابعد الجديده

وانا معاك انها مزاجيه وكانت تعضي اذا اريد انزلها من كتفي بس عمرها ما عضتني عضه قويه منها يطلع الدم

وان شاء الله يارب خير

وتسلم على مرورك العطر

[فيوزي]

العضه القويه غيره من الطير الجديد
الله يسلمك

[Love kasko]

خذيت عضه قويه من الطير الجديد وابدا مو مستغربه منها عادي واتوقع اقوى منها

بس اللي صادمني وخلني ابكي توته عشرة عمر تطلع مني الدم وانا اللي حاطتنها في عيوني

[H.B.H]

يا حليلك...ألحين تأكدت أن اللي عندك بنت وش هالغيره اللي من أول يوم
المهم ما عليك منها راح تتعود على الطير الجديد وبالنسبة للغيرة أتوقع لمن تشوف مساواة بالشغل مو تقصرين بالقعدة معاها يمكن ترجع زي أول
وبالنسبة للطير الجديد مبروك عليك وخليه أسبوع ولا أسبوعين بالقفص وروحي لعبي مع توته قدامه بعدين إذا شفتيه خضع للأمر الواقع أنك ما راح تسوين شيء له وشفتيه ما يعض طلعيه يتمشى بس لا تشوفك توته ولا راح تذبحك
أنا مرة كنت مطلعه الحبيب اللي عندي وبغيت أسوي شغله بالقفص بس ما أقدر أسويها وهو على كتفي رحت حطيته عند أخوي وما كان راضي ينزل من أيدي بس نزلته بالغصب يعني كلتها تشمخ وجروح وبعدين رجعت وخذته قام عضني على يدي بقوة أنا أستغربت كأنه يقول لي عقاب لك لأنك تركتيني
ومثل ما قلنا لك من قبل خلي الطير الجديد يولف على البيت بالأول بعدين يتعود عليك وأشوي أشوي بالتدريج مع توته حاولي تراضينها وتورينها أنك ما بتتغيرين عليها حتى مع وجود الطير الجديد يعني شوفي خلال هالأسبوعين اللي بيقعد فيها الضيف الجديد حطيها على كتفك وغيري الأكل والماي للطير الجديد بحيث أنها تحس أنها الأساسية عندك والطير الثاني ولا شيء بالنسبة لها يعني مثلاً طيري إذا جيت أروح عند أي طير وهو على كتفي مثل الكتاكيت أقول له شوف "دادا " وأعطيه أكل وأخليه ياكل واللي يطيح هم ياكلونه وبعدين يبدأ يطالع فيهم كأنه طفل وأكلمه كذا يعني
فهمتي علي...
و عذراً طولت الرد

[Love kasko]

فديت روحج ما قصرتي يا الغاليه والله يبارك فيج^^

والله يخليلج طيورج ونصيحتج على عيني وراسي بس خلي هالدلوعه تجي على كتفي مو اطنشني وتعضني مع اني ما سويت لي طير غيرها اي سالفه ومن بكره الصبح احاول ارجعها على كتفي ونسوي كل شي كالعاده بدون ما تحس بشي والطير الجديد بنخليه اسبوعين بعدين بفكر اطلعه برع القفص^^

وتسلمين على اهتمامج بالرد وخذي راحتج^^

[عشقي البلوفرنتد]

لازم تبيعي الجديده
لأن الدره مرره غييوره
اي سؤال اختي لوف كاسكو انا حاااااااااااضرر

[Love kasko]

مشكور يا اخوي عبدالعزيز

وان شاء الله بصبر هالاسبوع اذا ما تغيرت توته ببيع الجديده وامرنا على الله كله ولا الحب تتغير عليه

وتسلم ما تقصر

[عشقي البلوفرنتد]

يا هلا ومرحبا
اي استفسااار
انا حااااااااااااااااضررررررر