اشترك في نشرتنا البريدية ليصلك كل جديد

grey parrot · 22-11-2005, 06:40 AM

السلام عليكم و يعطيكم العافيه جميعا

اليوم و في هذا الموضوع حبيت انقل لكم موقف طريف و بايخ ابنفس الوقت حصل معاي
و هو كالتالي :

يوم الثلاثاء و انا على المكتب في العمل (( الدوام )) في الوزاره طلعت من المكتب و انتقلت الى مكتب السكرتير

هذا سكرتيرنه و اسمه (( محرووس )) طبعا الصوره مو صجيه

رحت حق محروس و طبعا كالعاده (( ما يعطي ويه )) بمعنى مزجوم في العمل و منهك ما بين الاوراق و الكتب الرسميه

المهم انا رحت أقدم إجازه حالي حال أي موظف مثالي

و فعلا قدمت اجازه لمدة اسبوع من تاريخ يوم السبت اللي فات و دخلت على المراقب ووقعها
و الربع كلهم حسدوني على الاجازه لاني الوحيد اللي وقعلي المراقب ابهالفتره و كل واحد يتصل حاسدني على هالـ 5 ايام !!! يا جماعه ترى كلها خمس ايام ليش الحسد ليش ؟؟؟

الحاصل

طلعت إجازه يوم السبت و و قضيت أحلى يومين في النقاهه و الجو في الكويت تدرون أن الشتاء بدت ملامحه يعني في منتصف الليل روعه للمخيمات و المزارع يوم السبت و الاحد

و بينما أنا غارق في النوم يوم الأثنين الساعه 12:30 ظهراً اسمع الهاتف يرن و لا يسكت

و يرن و يرن و يرن و يرن يرن

حتى أيقظني من النوم .... شفت التلفون و الا المتصل رئيس القسم

هذا اشيبي امصحيني (( امقعدني )) من النوم !!! ؟؟؟؟ اشصاير ؟؟؟

قتله هلا ابو ........!! خير آمر ؟؟؟

قاللي وينك انته مو امبين قتله انا اجازه الله يسلمك و الاسبوع الياي انشوفكم ان شالله

قاللي أي اجازه أي بطيييييييييييييييييييييييييييييييييييييييييييييخ ؟؟؟ !!

انت ما عندك رصيد اجازات أصلاً شلون طالع إجازه لوووووووووووووووول
و قعد يضحك علي بالتلفون و أنا طبعا انحبست أنفاسي و راحت فرحة هاليومين اللي فاتوا

(( و يا فرحه ما تمت ))

و ها أنا ابتداءا من اليوم أرجع الى نشاطي كموظف

و أول شيء راح اسويه بعد شرب القهوه في المكتب راح أشوف شغلي مع (( محروس )) السكرتير
لأني ناويله نية قشره

و مشكورين على حسن متابعتكم و الى اللقاء في موضوع آخر

بوفهد · 22-11-2005, 07:09 AM

والله كسرت خاطري ياخي

المفروض تتأكد من رصيد اجازاتك قبل لا تطلع اجازه

يالله ميخالف ، الله يعوض عليك

وشوي شوي على محروس

لحن الخلود · 22-11-2005, 08:13 AM

وراء كل إجازه جميله محرووس جميله يعكر صفو الاجازه
يلا ماعليه يا عزيزي تكبر وتنسى
وأتمنى لك يوم عملي سعيد

الاربش · 22-11-2005, 08:53 AM

زين اشلون على السبت والاحد والاثنين فيها خصم من الراتب ولا لا

عشان جذي الشؤون الادارية تطلب من الموظف تقديم اجازته قبل الموعد بثلاث ايام على الاقل

لتفادي الاخطاء

انا عندي خبره في الشؤون الاداريه مثل حالتك
يحسب يوم طارئه ويومين خصم هذا اذا عندك طارئه اصلا
او انك تقطها براس موظف الاداريه وارفع صوتك عليهم بانك مالك ذنب والغلط غلطكم

وشكرا على القصه

قناص · 22-11-2005, 09:36 AM

الله يعوضك يا أخوي grey parrot

بالفعل حسافة على اليومين االي راحو

وأنا اضم رايي لرأي الاربش . . لازم اتحطها براسهم أو براس محروس علشان تطلع منها
لأن انت مالك ذنب

ويا فرحة ما تمت

شاكر لك عزيزي

mina · 22-11-2005, 10:19 AM

والله هم زين قضيت لك يومين راحة

وزين انه عندكم محروس يغلط احنا المحروس مالنا ما يغلط نهائيا في هكذا امور

... ولا تدير بال خيرها في غيرها ...

grey parrot · 22-11-2005, 02:03 PM

مشكورين على مروركم يا اعزائي

بو فهد : يالله بعد صارت ...... هذي اللقافه و ما اتسوي .و اللي صار اني بالاجازه الاخيره طلبت تمديد و ما كنت حاسب حساب التمديد الل أخذته المره اللي فاتت

لحن الخلود : صدقت صج عكر مزاجي.و على فكره حلوه هاذي ( لحن الخلود بالأصفر ) :bdaysmile

الاربش : هذي فيها خصم الله يسلمك و انشالله انحاول فيها و الله كريم بس جنه ناوين عالخصم ماكو فايده يالله نكبر و ننسى .

قناص : الله يسلمك شفت اشلون صج حسافه و انا حطيت راسي ابراسهم بس ركبوني الغلط
و قالولي انته ما تأكدت من الرصيد . يالله الحمد لله على كل حال الفلوس تروح و تأتي مره أخرى

mina : خل يغلط مو مشكله بس مو خصم ثلاث أيام اذا السالفه فيها خصم عطني محروس مالكم و اخذ محروسنا

شاكرلكم اعزائي على هذا المرور اللي اسعدني حقيقة و بالتوفيق

توتو · 22-11-2005, 03:46 PM

مشكووووووووووووووووووووووووووووور على الموضوع

نعومي · 22-11-2005, 03:48 PM

خيرها بغيرها

انشاله السنه الجايه!!!

مع تحياتي:

عاشقه هامستر · 22-11-2005, 04:07 PM

ههههههههههههههههه كان زين ما قتلك المدير انت و محروووووووووووووووووووووووووووووووووووووووس
بالذات محرووووووس علي الاقل اخذت يومين