الأختبارات حسب نظرية فيثاغوس..اللي عنده ضغط ولا سكر لايدخل

[عاشق التحدي]

السلام عليكم

اخباركم طيبين

بمناسبة كثرة الأختبارات والي كل يوم معلــمـ/ـه طالعــ/ـه لنا بإختبار جديد ورأفة مني بحال الطلاب المساكين قلت أنزل هالموضوع ..



هذا موضوع مهم ولازم يواجهنا اربع مرات في السنه

الواحد لازم يلعب بخطه ناجحه مثل 4-4-2 تكون هجوميه مايلعب دفاعيه <======== كان يشوف مباراه قبل شوي

معليش اشتبكت الخطوط عندي

طبعا قبل الإختبارات الناس ينقسمون الا ثلاث اقسام :


القسم الاول / هذا القسم ويضم الفئه الممتازه (الدوافير) <=== للناطقين بالعاميه خخخ

هذولا الله يسلمكم قبل الاختبار بشهر تجيه عدة أعراض نذكر بعضا منها:
1- حالات اغماء

2- مغص

3- ما يشتهي شي

4- ما يطلع من الغرفه

5- مافيه الا كوب شاهي رايح وكوب قهوه جاي

6- طبعا الجوال مقفول عشان مايدق عليه احد يقوله بالله الدفتر حقك كامل <==== حركات قديمه يسرقه ولا عاد يرجعه

طبعا هالقسم راح تعرفه من شكل كتابه تلقاه متقطع وعليه اثار شاهي وقهوه اللي يشوفه يقول قالبه صينية اكل <====== هذا تفكير الداجين مثلي

الله يفكنا من شر هالقسم <<<

القسم الثاني / اللي مايذاكرون إلا في ليلة الإختبار (داج بس يبي ينجح) :

هذولا ناس داجين بس فيهم امل
يعني ايام الاختبارات يشد حيله شوي
بس اذا دق عليه خويه قاله وش تسوي يرمي الكتاب يقول فاضي يقول امرك يقول تعال ماعنده مانع يبي يفتك من البيت ..

هذا يوم الاختبار ماتجيه الا حاله وحده يقفل جوووه ويقعد ياللعن ويسب يقول ليتني مذاكر بدري وليتني ماطلعت مع فلان وعلان بس اذا فات الفوت ماينفع الصوت <===== والله يطلع مني درر ترى <<< اقول طس


هذا القسم تعرفه من كتبه تشوفه جايب الكتب معه ولا يدري وش فيها بس يكتب فيها ويشخبط يجلس يطلع مواهبه الشعريه على الكتاب << ابد موب انا


القسم الثالث / وهو محور الحديث وهو القسم الداج من المجتمع ويرددون هذا الشعار ( أنجح أنجح ما أنجح بكيفه) <=== يعجبني هالشعار


هذا القسم هو سبب المشاكل في المجتمعات

طبعا هالقسم مايدري الاختبارات جت ولا لا يحسبه يوم عادي

وهذا تعرفه من الشكل

تشوفه جاي مايدري هو جاي المدرسه ولا جاي قهوه

مامعه ولا كتاب

وجاي يسحب رجوله واخلاقه زفت لو يكلمه واحد تهاوش معه



مثل ماشرحت لكم هذا قبل الاختبار تعالوا نشوف بعد الاختبارات وش يصير

بعد الاختبار :

الدوافير / يطلعون من الاختبار وهو قافله اخلاقه

وراسه مصدع وحالته يرثى لها

اذا سأله واحد كيف الاختبار يقول ياخي بغيت اغلط في سؤال بس اشوى انتبهت له <== بالله عليك

==

القسم الثاني / يطلع من الاختبار وهو مبسووووط تساله هاه كيف الاختبار يقولك ميه الميه انشا الله درجه كامله <==== يصير خير



القسم الداج / يطلع من الاختبار متلطم تساله كيف الاختبار يقولك مادري بس بروح انام كنت مواصل<== طبعا كان يهجول او جالس يشوف ستار اكاديمي << ياكرهي لها البرنامج


=======

اذا طلعت النتيجه تعالوا شوفوا اللي صاير

الدوافير تلقى بعضهم يصيح وبعضهم يضحك اللي يصيح ضاعت عليه درجه والمبسوط يقول اشوى

القسم الثاني / تلقى الناجح مبسوط واللي سقط يقول ليتني ماطلعت هذاك اليوم يعني بيحفر يذاكر دور ثاني

الداجين / مثل ماجت مثل ماراحت يقول ايه دور ثاني كالعاده ونسبة النجاح عندهم 20 % هذا اللي حظهم يفلق الصخر تلقاه يكتب من راسه او احد يغششه ويالله نجح


ارجو اني جبت لكم فايده من هالموضوع <===== اي فايده يرحم امك

تقبلو تحياتي


يالله

س
ل
ا
م

سلاااااام