لأصحاب الخبره في الدره الهنديه ارجو الدخول

[ورق عنب]

السلام عليكم .. الله يسعد مساكم وصباحكم جميعا

عندي ببغاء دره هندي .. واعتقد انها انثى لكن ما ادري كم العمر

عموما يالغالين .. سؤالي هو كيف اقدر اروض الدره الهنديه بحيث انها تكون اليفه ؟؟

مع العلم انها تخاف مرررره لدرجة اني اذا قربت من القفص تطير داخله تحاول الإبتعاد .

واذا فتحت لها القفص تطلع وتمشي وتحاول تنحاش .. بس محجر لها

ياليت اللي يقدر يفيدني بأي شي عن الدره الهنديه وطرق ترويضها وكيفية تلقينها الكلام ... الخ

وجاي على بالي اجيب لها ذكر اليف يونس وحدتها كودها تنتج عندي

ونزلت موضوع عن طلب ذكر دره هندي اليف في قسم الشراء وساحبين علي العالم الين وصل موضوعي في الصفحه العشر طعش

شاكر لكل من دخل موضوعي وشرفه

[سمكه فوشيه]

سبحان الللله نفس اللي عندي خواااااااف
مدري كيف بروضه

ان شا الله يفيدونك

بس انا قالو لي قبل تبدأي التدريت اقص جناحاته و اظافره وابرد منقاره


.

[صوغة]

وعليكم السلام وصباحك احلى وأسعد

مبروك عليك الدرة الله يحفظها لك

ممكن تعرف العمر من العين ولون المنقار

اذا نفس الي بتوقيعي فعمرها سنتين

بالنسبه انها خوافه وتهرب لقربت من القفص فهذا يعتمد على المدة الي قضتها عندك

من متى عندك؟

تبي لها وقت عشان تطمن لك وتتعود على مكانها الجديد

وحط ببالك الدرة عنيدة موت وعصبية موت وتفزع واتخاف من أي حركة مفاجئة .. حاول تكسب ودها وادلعها ولا اتفاجئها بجيتك اتركها بدون تدريب ولا تعليم لمدة اسبوع اسبوعين او حتى شهر

واذا لاحظت انها تعودت عليك وقتها لكل حادث حديث

أطلع على هذا الرابط راح يخدمك وايد في معرفه كل شي عن الدرة وترويضها وأكلها وغيره

http://www.2zoo.com/vb/showthread.php?t=74344

[ورق عنب]

المشاركة الأصلية كتبت بواسطة سمكه فوشيه

سبحان الللله نفس اللي عندي خواااااااف
مدري كيف بروضه

ان شا الله يفيدونك

بس انا قالو لي قبل تبدأي التدريت اقص جناحاته و اظافره وابرد منقاره


.

حياك الله خيتووو .. اجل الله يعينك عليه من جد متعب ما خليت شي ما سويته معها عشان اكسب رضاها .. تخيلي لدرجة اني بأجيب لها زوج كودها ترضى علي وتوالفني وان جبت لها رجل يا خوفي والله تسحب علي خير شر

شكلي بأقلب الدعوة تربية سمك

[ورق عنب]

المشاركة الأصلية كتبت بواسطة صوغة

وعليكم السلام وصباحك احلى وأسعد

مبروك عليك الدرة الله يحفظها لك

ممكن تعرف العمر من العين ولون المنقار

اذا نفس الي بتوقيعي فعمرها سنتين

بالنسبه انها خوافه وتهرب لقربت من القفص فهذا يعتمد على المدة الي قضتها عندك

من متى عندك؟

تبي لها وقت عشان تطمن لك وتتعود على مكانها الجديد

وحط ببالك الدرة عنيدة موت وعصبية موت وتفزع واتخاف من أي حركة مفاجئة .. حاول تكسب ودها وادلعها ولا اتفاجئها بجيتك اتركها بدون تدريب ولا تعليم لمدة اسبوع اسبوعين او حتى شهر

واذا لاحظت انها تعودت عليك وقتها لكل حادث حديث

أطلع على هذا الرابط راح يخدمك وايد في معرفه كل شي عن الدرة وترويضها وأكلها وغيره

http://www.2zoo.com/vb/showthread.php?t=74344

الله يبارك بأيامك ولياليك اختي

والله وانا اخوك موب بعيده عن اللي بصورة التوقيع عندك .. بس مدري احس انها اصغر من سنتين لكن اليوم ان شاء الله بأدخل عليها و ( اويدز = أطل ) على خشتها وأتأكد من منقارها وعينها .. وان شاء الله بحاول انزل لها صوره بعد .

والله وانا اخوتس لها عندي الحين تقريبا ازود من الشهر .. يمكن شهر وشوي .

أنا من يوم جبتها وانا حاطها بالملحق ومضبط لها المكيف ومعيشها في أجواء رومانسيه بس ما والفت علي للحين مدري هي شاكه بنفسها ولا وش بلاها علي شكلها تشك اني بأضرها ولا بأعذبها .. مع اني مدلعها ولو تطلب مني سياره شريت لها سياره وخليتها تتعلم السواقه بس ترضى علي وعجزت عنها

احيانا وانا جالس بزاوية الملحق وما علي من الشيطان طاري وجالسن بحالي واتابع التلفزيون وقناة فنون ومسرحية طارق العلي وخاش جو .. التفت عليها والقاها تطالعني بعين وكأنها حاقده علي .. واحسها تقول في نفسها .. ما ودك تفتح القفص وتفتح لي الباب وتطلق حريتي بدال هالوجه الشيفه اللي مقابلته واللي يسد النفس

اي صح على طاري فتح القفص .. انا احيانا افتح لها القفص واخليها تتمشى بالملحق بس مافيه فايده .. كل ما قربت منها تنحاش وتطير على خفيف تبي الهجه مني .. مدري عاد هو وجهي اللي ما يساعد ولا ان الدره تتدلع ولا مدري وش فيها .. فكرت اني اوديها لمحلات الفندقه يسوون لها توليف .. بس احس حتى لو والفت عندهم ورجعت عندي بأكون شخص غريب عليها وما راح تولف معي


جزاك الله كل خير خيتووو ما قصرتي وان شاء الله بأدخل على الرابط واشوف وش السالفه

[صوغة]

شوف اخوي هذا الرابط للاخت دودي

روضت درتها بأسبوع

أتبع طريقتها لعل وعسا تنفع مع المحروسة درتك


http://www.2zoo.com/vb/showthread.php?t=204405

[ورق عنب]

اوكي خيتوو يعطيتس الف الف عافيه

بأجرب طريقة الأخت دودي والأخوان اللي ردو عليها بموضوعها وكانت لهم تجارب مع الدره

بس هالمحروسه مدري ليه حاطتني براسها

مره روشتها وبغيت اسوي لها حمام زيت ومساج وصنفره وكل شي بس قلت تنعمي عيونها

احس الطيور تحب المويه ما خالفت ابد ولا خافت يوم روشتها .. بأجرب اعطيها عسل ان ضبطت الأمور فالحمدلله .. وان ما ضبطت بأعطيها زيت خروع

تشكرات خيتوو .. الله لا يهينك