اشترك في نشرتنا البريدية ليصلك كل جديد

احمدحماده · 13-03-2009, 04:03 AM

السلام عليكم ورحمة الله وبركاته
تحيه طيبه
انا سبق كتبت عن ببغائي الرمادي الافريقي
بانه صعب ترويضه وانا واحد ماعندي فكره بالمره
بس احبهم بأنواعهم
سؤالي هل يوجد مكان او شخص متخصص يروض لي ببغائي ويعلمه الكلام
بالدمام
وجزاكم الله خيرا

سكر · 13-03-2009, 05:19 AM

والله أخوي لو عندي وقت ابشر

بس اللي اقدر افيدك فيه انك تجيبه عندي تخليه كم يوم وبعدها بعلمك كيف تتعامل معاه.

انا حالياً عندي أمازوني وعندي غيني تمنه

بس واضح انك انت تحتاج للتدريب مو ببغاءك

انا في الدمام خلينا نتقابل وننقل التجربة للأعضاء بعد ما تظهر النتائج.

وان شاء الله تلاقي نتيجة

تحياتي

عبادي والجو هادي · 13-03-2009, 06:09 AM

انا بالرياض مشكلة

لكن اقرا في المواضيع المثبته

انا كنت مثلك ما اعرف اي شيء قالي واحد من العيال سجل وشف والله سجلت وهذا انا ما شاء الله

احمدحماده · 13-03-2009, 04:57 PM

اخي العزيز سكر
تحيه طيبه
انا سبق عرضته على قريب لي من اصحاب الخبره في الترويض
جلس عنده شهر ورجعه وقال لي عنيد وراسه يابس ولاقدرت عليه
عندك استعداد تقابلني وتاخذه تدربه
واكون لك شاكر

سكر · 14-03-2009, 01:34 AM

ايه ابشر من عيوني

اليوم ان شاء الله في أقرب وقت نتقابل ولا يهمك وآخذه عندي كم يوم وان شاء الله نلاقي نتيجة يا قمر

تحياتي

احمدحماده · 15-03-2009, 12:20 AM

عزيزي سكر شيك على الخاص ارسلت لك رقمي
انا بانتظارك
ولك كل الاحترام والتقدير

ابو سفر · 15-03-2009, 12:40 AM

بالتوفيق لكم جميعا

سكر · 16-03-2009, 04:03 AM

هذا ببغائك الجميل اللي للحين ما تعرفت على اسمه

وأبشرك أكل من يدي وخف جعيره عن أول بكثير, لكن ما زال يجعر اذا أحد لمسه.
لكنه ما يقول شي اذا بتقرب منه بس زي منت شايف في الصورة جالس أأكل التمنة وهو يطالع.

هذي صورة جناحه قبل ما أقصه كان مبهذل وتالف بسبب عدم الاستحمام.
وكما هو واضح كان فيه محاولة قديمة لقص جناحه بطريقة خاطئة, ولكن لم تكتمل.

أعتقد ان اللي كان بيقصها بطل من شدة توحش الببغاء. (وبيني وبينك معاه حق

)

هذي صورة ريشه قصيته اليوم بعد ما اعطيتني اياه.

وترى بخليه في علبة واعطيك اياه عشان ما تقول اني رجعت ببغائك ناقص

على فكرة .

انجرح جرح بسيط لما نزلناه من السيارة, الظاهر انه صدم في الشبك بقوة وجرح من عند خشمه.

ما يأثر ان شاء الله بس شكله خايف بشكل غير طبيعي ومستعد يأذي نفسه ولا يسمح لأحد يقرب منه.

أضن انه يحتاج فترة أطول عشان يتأقلم.

دعواتك لي بالتوفيق في ترويضه لأنه فعلاً تحدي.

تحياتي

stavol75 · 16-03-2009, 01:12 PM

بسم الله الرحمن الرحيم

سكر يعطيك العافية على مساعدة الاخ احمد

ومتابعين الموضوع معاك للنهاية ان شاء الله

بالتوفيق لك في هذا التحدي الشييق.

سكر · 16-03-2009, 04:20 PM

اليوم العصر روشته وطلعته بعد ما نشف برى السطوح

وجلست معاه شوي

صار يطلع من خشبة الى خشبة لما اقوله اطلع.

وبعدين بحمد الله طلع على يدي (أضافيره طويلة مرة)

بس مو مناسب نقصها الحين.

علماً ان الطائر كبير في العمر ويوصل حوالي من سنة وشهرين الى سنة ونص تقريباً

وهذا رد لكل من يقول أن الببغاوات الكبيرة غير قابلة للترويض.

هذي صورته

طبعاً هذا اللي صار يعتبر نقله كبيرة, لأن الببغاء كان مرعووب بشكل غير طبيعي, وعمري ما شفت مثله في الخوف, والعناد.

لكن المهم الحين ان اللي صار مجرد بدايه, وممكن ينتكس مثل أول ببساطة.

هذي تعتبر أصعب مرحلة, اللي هي تعزيز التدريب وترسيخه حتى يصير عادة مألوفة عند الطائر.

وان شاء الله أحاول قد ما أقدر أفهم طبيعته وأختار الأسلوب المناسب له في التدريب بعون الله.

اقتباس:

المشاركة الأصلية كتبت بواسطة stavol75