اشترك في نشرتنا البريدية ليصلك كل جديد

mona83 · 19-09-2015, 11:30 AM

السلام عليكم
انا مكتوب عليا انه ربي يحط بطريقي القطط الصغيرة اللي مو لاقية احد يرعاها ما اعرف ليش..بس ولله الحمد احس مبسوطة لاني فعلاً احب القطط بس مشكلتي القلق الزايد ..
قصتي دي المرة انه جاتني قطة سيامي يمكن عمرها مايتجاوز الشهرين في البداية اكتشفت انها معدومة فطريات .. هي كان نشاطها ماشاء الله عالي وتحب اللعب وذكية..
وديتها لعيادة الحمراء عندنا بجدة طبعاً هزأني عالفطريات مع انه مالي ذنب مالها غير يوم واحد عندي.. حلق شعرها وصار لمدة 3 ايام يديها ابر..
كتبلها دوا زكام مضاد حيوي اللي كرتونته زرقا .. واستمريت عالبيتادين ومعاه بخاخ ومرهم دحين ليا 6 ايام قبل 3 ايام نصحني الدكتور اشتري طوق علشان لا تلحس الدواء من جلدها لانه البتادين يكون معبي جسمها كله طبعاً غير العزل .. قالي حطيها بمكان معزول علشان العدوى عندي خيمة للاطفال حطيتها فيها هي والليتر بوكس والاكل تبعها..
المشكلة من بعد العزل وبالذات بعد الطوق اللي صرت احطه قلبت 180 درجة صارت خاملة وماتحب تتحرك واحياناً ترتعش حتى ماصرت اسمع صوتها بس تبغا تنام .. والمصيبة تتبول باي مكان طبعاً البراز في الليتر بوكس اما البول لا في كل مكان حتى لو بمكان نومها..
واللي زاد الطين بله قبل امس الوالد اعطها لحمة مفرومة من غدانا هو يقول غسلتها من البهارات والكشنه واديتها بس تخيلوا مسكينة جاها اسهال امس وزاد خمولها بالقوة تتحرك بس نووووووم ..
الاكل الان بس زبادي ورويال كانون للكيتينز وموية..والحمدلله اتوقع حتكون احسن لانه برازها ثقل شوي صح ما رجع طبيعي بس اثقل من امس..
المشكلة الان في الخمول وعدم رغبتها باللعب وكمان التبول وجسمها ينفض فجأة او يرتعش كأنها بردانة !!
يارب تكون بخير طمنوني عليها اذا حالتها تستدعي ارجها للدكتور بس ما ابغا ارجعها احس من بعد ماجبتها من عنده وعزلتها واستخدمت الطوق صارت ما تتفاعل وبس تنام حتى صوت مالها..
انا روشتها مرتين يوم الثلاثاء وامس لانه البتادين مرتين باليوم فيخلي شعرها يابس فهي تكون قرفانة من نفسها..

بس احتاج اطمن على حالتها واعرف دا الخمول ايش ؟ طبيعي ولا فيها شي؟
وكمان حل للتبول الله يسعدكم..

وشكراً