اول مره اشتري بادجي

[طيرو]

السلام عليكم ورحمه الله وبركاته

اخواني اليوم شريت زوج بادجي بس المشكله راعي المحل يقول مايقدر يحدد الجنس لانهم باقي صغار

وانا الصراحه ماحب ادور كثير في السوق اخترت الالوان الي تعجبني والي حركتها كثير ف القفص

بس ابي منكم تحددون لي جنسها ونوعها ، وياليت تعطوني نصايح لهذا النوم من الطيور لاني جاهل فيها

وهذي صورتهم ، واذكرو الله






معليش التصوير مو ممتاز بس تعبت وانا الحقهم بالكامرا

[Besa]

وعليكم السلام ورحمة الله وبركاته

أول شيء مبروك عليك الطيور
طيور البادجي طيور حلوة وتربيتها ممتعه
ونقطة ممتازة لمبتدئ إنك ركزت على الطيور كتيرة الحركة
يعني بديت تكتسب خبرة من أول لحظة
عندك الأبيض لون الكير بنفسجي يعني دكر
والكير هيه المنطقة اللي فيها فتحات التنفس
وعمرو تقريباً مابين 4-5 شهور غير بالغ
العمر تقدر تعرفو من حدقة العين في طرق تانية بس ماحضيعك
حتشوف لون رمادي باين في العين ودا حدد عمرو
نيجي لنوعو باندد سينجل فاكتور كوبالت
الطائر التاني عندك الكير الصورة الأولى قالت دكر
والتانية حسيت الكير فاتح حيكون أنثى
يعني الجنس عشان أتأكدلك منو لازمني صورة واضحة زي الأول
لأن الصغار يكون أصعب شوية التحديد لأنو كل الجنسين يكونوا وردي
بس الدرجة اللي حول الفتحات بالضبط هيه اللي تميز
لوكانت بزرقه خفيفة يعني دكر ولو كانت بيضا يعني أنثى
عمرو 3 شهور لأنو اللون في العين أغمق موواضح زي الأول
ونوعو عادي موف يلو فيس
بخصوص النصايح الأساسية وبشكل عام
حتشيل العش أول شيء مرا بدري عليه
حتشتري مشربية إسطوانية تتعلق في القفص
ودي تضمنلك مويه نظيفة لطيورك بعكس المكشوفة
حتجمع أوساخ وتسبب الأمراض
الأكل الأساسي حبوب بس تكون نظيفة من السوس والحشرات
بس الحبوب لوحدها ماتكفي لازم جنبها وجبات
الوجبات تكون على مدار الإسبوع
الخضار والفواكة مرتين بس في الإسبوع كترتها تسوي إسهال
تغسل الخضار والفواكة كويس وتجففها وتشيل البدور والقشرة منها
وماتكون متعفنه أو مرميه في أرضية القفص يافي صحن أو تعلقها بمشبك
عندك البيض مرتين تسلقو لمدة 20 دقيقة وتقشرو وتقدمو لطيورك
لوالطيور نحيفة تخلي الصفار ولو الطيور شحمت أو سمنت تشيل الصفار
البيض من أهم الوجبات عشان البروتين ودا يبني جسم وريش الطيور
عندك القمح أو البقوليات المنقوعة مرتين في الإسبوع
عندك اليوم الباقي راحة للطيور يكون بس حبوب
الوجبات تنحط في الصباح للظهر وتنشال لأنها تخرب
وكمان لأن الصباح وقت نشاط الطيور وكدا تضمن هضم الأكل لآخر اليوم
ومايصير عندهم سمنة أو عسر هضم
عندك عظمة الحبار أو السيبيا عند المحلات أو العطارة
لازم تعلقها في القفص على طول وكل ماخلصت تعلق تانية
دي أملاح وكالسيوم لعظام الطيور وكمان لتكوين قشرة البيض في الأنثى
النظافة ضرورية سواء لقفص ومحتوياتو أو لطيور
عندك تحميم الطيور في مكان دافيء بعيد عن الهواء بس تنتبه للوجه وإنته ترشهم
ولو كبروا شوية ممكن تستخدم مغطس وعاء صغير
بكمية موية بسيطة مع كم نقطة من خل التفاح
خل التفاح شيء طبيعي ضد حشرات الريش وكمان يعطي قوة ولمعة للريش
ممكن تستخدمو في مرش يعني خل تفاح تخففو بشوية موية وترش الطيور من وقت لوقت
دي المعلومات المبدئيه اللي تحتاجها بس أكيد في معلومات تانية لمن تقرأ مواضيع القسم حتفيدك
وأي سؤال عادي القسم مفتوح لأسئلتك بأي وقت
وبالتوفيق يارب

[mnoo12]

بتوفيق يارب فادتك كل معلومات اللي تحتاجها

[طيرو]

الله يجزاك خير تعبتك معي

[Besa]

السلام عليكم

ويجزاك خير لا تعب ولا حاجة
وبالتوفيق يارب