قطي يستفرغ + شعره المتجمع + مغرور ومتكبر ><"

[B E R R Y]

السلام عليكم ورحمة الله وبركاته ،

مشكلتي ياحبايبي انو قطي نظام اكله موحده لا يحب اكل المعلبات ولا يحب اكل المجفف للقطط ولا اللحم ولا اي شي ثاني ورغم كل هذا يطفش من اكله الموحد اللي هو الدجاج المسلوق

احاول اسوي له عالفرن من غير ثوم من غير شي ماياكل ساعات يظل يوم كامل عايش على جبن كيري او جبن البقره الضاحكه ، عدلت باكله نوعا ما اني احط ورق غار وشويه دارسين عشان ينكه الدجاج صار ياكله الحمدلله ، برضو اشوف قطط كثيره تاكل موز برتقال بطاطس اي شي لكن الا قطي ابدا مايحب اي نوع من الخضره والفاكهه حطيت له في الدجاج المسلوق بطاطس وجزر لقيته اليوم الثاني مستفرغه ، بنفس اليوم انا اتوقع لاني طلعته للحوش ويمكن اخذ نزلت برد وبرضو ماتقبل الاكل وعشان كذا استفرغ

ومو اول مره يستفرغ والمشكله اخاف عليه واخاف من الله فيه اني احرمه مايطلع ويلعب واخذ ذنبه ويتشفق عالحووووش كثييييييير اطلعه على وقت الظهر لما الجو يدفى يستانس ومايرضى ادخله

وش اسوي له باكله اخليه زي ماهو تعود عليه دجاج مسلوق + جبن كيري + حليب وموية

---

المشكله الثانيه شعره بسم الله ماشاء الله حلو وكثيف لكن مو بكره لا بالشي المعقول انه يطفشه مايرضى امشط له شعره ولا اقص له اظافره ولا حتى اسبحه يعني كل شي بالغصب امسكه انا وخواتي وانواع الصراخ ايدي تشوهت كليا من اظافره وعضه لكن باسه قوووي وعنييييد ومغرور جداً ، المشكله انا ربيته لكنه مايتدلع علي كثر امي وابوي يعني هم سافطينه ومو معطينه اي اهميه وينسدح عندهم يطلع لهم اصوات الا انا
شعره يتجمع في اماكن تطفشه اشيلهم لك ياولد لا مايرضى بالة حلاقه بمقص اشيلهم له شوي شوي رغم انه يتشوه شكله من برا لكن ما اعرف اي بيطري ثقه اخليه عنده ولو فيه بعيد عنا
مايحب النوم عالفرش رغم برودة الجو يبي بس الارض نادر جدا الاقيه عالفرش لكن لو شفته اغطيه ببطانيه - يكش على الغرب اذا جاو البيت ويسوي لنا رعب بالبيت وازعاج صرنا نحبسه بالغرفة عشان مايحرجنا

--

طولو بالكم معي

- مشكلة اكله وش اسوي فيها اخليه على وضعه ؟
- مشكلة قص اظافره وشعره اسويهم له من شهر لشهر رغم عناده ؟
- مشكلة غروره وتكبره كيف اتعامل معه واخليه قط يحب التحضن مايحبهم ابدا من اشيله يزعل ؟
- مشكلة التزاوج متى وقته ومن وين الاقي له عروس ؟
حبيبي عمره بالضبط ٨ شهور داخل عال ٩ شهور ويطلب التزاوج بكثره وفرش نومي من كثر مايطب عليهم صرت اغسلهم منه وش اسوي بحالتي معه