[wwvip]

السلام عليكم

صباح الخير لمن يقرا الموضوع في الصباح ومساء الخير للي يقراه بالمساء

اخبار اليوم الثاني + الثالث

اليوم الثاني

نفس وضعه اليوم الاول بس اردى شوي ..

لا يشرب ولا ياكل ابد

طبعا ما قدرت اسكت على الوضع هذا

واخذت شوي ماء ممكن 10 سنتم في قطاره

وقمت اقطر في فمه بالغصب والله وهو قاعد يشرب بالغضب

احيان احسه يشرق واوقف شويات وارجع اعيطه

اعطيه 10 سنتم 7 مرات امس الحمد لله

بعد كذا جبت زبادي الصافي

وحطيت له شويات في فمه وقام ياكله وباين عليه ما يقدر يستسيغه ابد لانه حامش شوي


وحطيت له حليب بعد لكن ما كثر حليب

المشكله الوحيده اللي الان تواجهني معاه

هي الاكل والشرب !!

ما يشرب ولا ياكل الا بالعافيه وبالقوه !!

مسكين ما يقدر ينزل راسه ولا يقدر اضلا ياكل لانه ضعيف بشكل كبير

طبعا باذن الله بكرى باخذ له ماء الاطفال حق السوائل + مضاد حيوي شراب للاطفال + فيتامين للاطفال

طبعا مر اليوم الثاني بسلام واعطيه دواء البيطري على موعده

وانتهينا من اليوم الثاني بسلام


اليوم الثالث
صراحه هذا اليوم اللي سويت فيه شئ جديد

المره هذي رحت لطبيب بطري تجاري << يعني استغلالي

كان من احد الجنسيات العربيه الله يستر عليه وكان شايب بشكل كبييييير !!

تفحص القط وقام يستهبل شوي

انت شاريه ليش !!

وش تبي فيه !!

هذا مريض بقوه !!

وانا قاعد ساكت انتظر التقييم حقه وبشوف وش سالفه امه

شوي الا قال هذا تعبان كثير وما اقدر اشوفه وافحصه الا بعد ما تروشه ..

يعني يبيني اغسل القطو عندهم ب 85 ريال !!

انا ما سكت له ..

قلت انا يا اخي ما استفدت شئ منك .. انا عارف انه مريض وعارف انه وصخ
بس مو معقول ان وصاخته تمنعك تعطيني تقييم للحاله او تعطيه على الاقل مضاد حيوي

ورفعت صوتي عليه بقوه لانه قليل ادب ..!!

بس بعدها

تخيلو طلع ذا الشايب شغال بالاستقبال يعني يعطيك كرت انتظار وبعدين يدخلك على الطبيب المعالج !!!!!!

شافه الطبيب وانفجع ووريته الادويه اللي اعطاهم اياها زميلي وقال اوكي كذا مضبوط بس لازم انت تغذيه بنفسك .. ولا تغسله ابد ابد ابد لانه مو مستحمل غسيل والله يعنيك على وصاخته

وكتب لي اسم مضاد حيوي بشري قال اعطيه اياه عن طريق الفم مده 5 ايام مرتين باليوم

بس خله من بكرى تبدا بعد ما يخلص موضوع الطبيب الثاني من ابر الخ

وقلت له عن فاتح الشهيه او فاتمين

اعطاني عصار لونه بني تعصر شئ بسيط بين الفم والانف ويقوم القط بلحسه .. يفتح الشهيه وفيتامين بنفس الوقت ...

انا صورت العصار وصورته تحت

بعد كذا رجعت البيت بعد ما اعطيته الابر .. وكان اليوم اخر يوم بالنسبه للابر
بس الاختلاف ان الطبيب المره هذي زاد عليها فتامين عن طريق الفم لونه اصفر وريحته زفت
واعطاني استرنجه فيها حق يومين

رجعت البيت وجبت علبه زبادي واسترنجه كبيره خاصه باطعام الطيور وكذا

حطيت داخله ممكن 30 سنتم زبادي

واتهاوشت انا وياه

انا اقول والله انك لتشرب ذا الزبادي كله

وهو يقول

لا مستحيل مش عايز والله مش عايز

وطخ طيخ طوووووخ مره هو يقفل على بالشباك ومره انا اقفل عليه

ومره يعضني ومره اعضه << متأثر بتوم وجيري خخخخخ

المهم اعطيته الزبادي

ثم جبت ماء دافي وملح زي العاده
ونظفت له خشمه تنظيف خووورااافي

وصار ماشاء الله خشمه نظيف

بعد كذا حطيت له كريم العين وقلت سلام يا قمر نام

وبعد ساعتين جيته مره ثانيه واعطيته ممكن 20 سنتم زبادي ونفس العاده هو يحلف وانا احلف ..




الان المشكله اخواني بالاتي

// رفض الاكل تماما عن طريق المحقن او القطاره واذا خليته على راحته ما اكل شئ !
// كذلك الشرب نفس اعلاه !!
// وش رايكم لو اهرس له دراي فود واخليه زي السيري لاك واعطيه بالفم جرعات 4 او 5 مرات ؟؟
// او اعطيه تونه لان ريحتها قويه سواء بالمحقن او براحته ياكل .. انا اعرف ان التونه تسوي له زحمه بس عادي اصلا ما في بطنه شئ عشان اوقف التونه ؟
// ايش رايكم احط له جبن مثلث بالعصار واعطيه ؟


// ريحته ما اعاد اقدر اتحمله ابد .. ناوي اروشه بس بماء دافي واستشوار بعدها على طول .. مع اني متردد بس صراحه لازم لانه قذر جدا جدا ..

وهذي صورة العصار اللي قلت لكم عليه وش رايكم اشتريه .. سعره 142 ريال




انتظروني قريبا بعد ما يشفيه الله