[Musab Pro]

السلام عليكم ورحمة الله وبركاته

اولا اعتذر عن الغياب والتأخير لكثرة المشاغل الله يعينا وياكم على الخير بهالشهر الفضيل

الموضوع جدا كبير ويحتاج الى مرحلة تأهيليه واتمنى اني اوفق في هذا الشرح

الاحداث اللي صارت لك مع الكلب تدل على وعي منك وبنفس الوقت بعض الاهمال

اخذ الكلب الى بيطري بسرعه تصرف ممتاز جدا و وجود بيت مكيف له ومريح شي ممتاز

ولكن الحادث اللي صار له بالحديقه يعتبر اهمال منك ونفس الشي اللي صار مع السياره .

فاتمنى منك اولا اخي الكريم انك توفر بيئه امنه للكلب و مراقبه له خصوصا اذا كان عمره صغير ومع

الوقت الكلب راح يعرف الصح والغلط .

ثانيا مرحلة العلاج .. يجب التقييد فقط بالادويه والنصائح اللي اعطاك اياها البيطري ولا تكرر

نفس الغلط اللي سويته مع كلبك القديم اللي هو علاجه بادوية الاطفال . لانها غالبا مضره

للكلب وكثير من الادويه مكتوب عليها NOT FOR ANIMAL TEST وعضها مو مكتوب عليه

هذا الشي ولكن مو معناه اننا نستخدمه للحيوانات .

ثالثا والاهم .. المرحله ما بعد العلاج .. الكلب مر في شي اسمه باد اكسبيرينس (ذكريات مؤلمه)

ونتج عنها شي اسمه باد بيهيفير (تصرفات خاطئه) .

في المرحله هذي لازم نكون حريصين ان الكلب ما يتعرض للباد اكسبيرينس مره ثانيه

لانه خطئنا ميه بالميه .. هو ما يفهم الحين و حنا اللي لازم نراعي هالشي .

وتبدأ الحين مرحلة التصحيح وهي صعبه جدا وتحتاج فقط الى طولة البال والصبر .

يعني لو كان عندي بالحديقة اداه حاده وشفت الكلب يتعرض لها المفروض اول شي اقوله نووو

واشده عنها واعطائه اشارة تنبيه ان هذا الشي خطر . ثم اقوم بابعاد هذي الاداه عشان ما يتعرض لها

مره ثانيه . ونفس الشي لو في اشياء معرضه للسقوط مثل خرطوش المويه اللي طاح عليه .

تصحيح البيئه اللي بالحديقه وجعلها امنه هو الشي الوحيد اللي راح يخلي كلبك يطلع من بيته

ويرجع للحديقه خطوه بخطوه .. لازم تكون معاه و تكافئه على شجاعته وتستخدم معه التشويق واللعب

لين ينسى انه بالحديقه وينسى خوفه وهذا الشي بيستغرق وقت طويل ويعتمد على فهم الكلب

و قوة الصدمه اللي تعرض لها .. دائما لا تجبره بالخروج بالسحب والغصب ..

بل باستخدام التشويق واللعب والاكل . وبعد فتره بيرجع طبيعي انشالله

بالنسبه للي صار له مع السيارات ايضا راح يصير عند كلبك فوبيا سيارات وهذا يعتبر عيب

فالافضل انك تعالج هذا الشي بتعريض كلبك للسيارات بطريقه امنه وحذر اكثر .

يعني اول شي تتمشى معاه عند سيارات واقفه . وتلعب معاه قريب من السيارات الواقفه وتخليه

يشمها ويتفحصها وانت بالقرب منه عشان يشعر بالامان . و بعدين تلعب معاه

صيده ما صيده بين السيارات

الى ان ترتفع فيه الثقه شوي . بعدين تنتقل الى مرحله تكون فيها بالقرب من سيارات

تمشي وهكذا الى ان يستعيد الثقه بنفسه ويبتعد الخوف .

هذه هي القاعده افضل طريقة لابعاد الخوف من الكلب هو تعريض الكلب للمواقف اللي

يخاف منها مع وجودك بقربه وتحميسه وتشجيعه .. نفس الشي يطبق في الاماكن العاليه و المسابح

والكلاب الاخرى والبشر والاصوات المزعجه وجميع الاشياء اللي يخاف منها الكلب .

قضاء وقت اطول مع الكلب و تمارين الطاعه راح تزيد ثقة الكلب و تساعده الى الرجوع الى وقته الطبيعي

اما بالنسبه لوضعه الصحي .. انشالله انه يرجع بسهوله اذا واضبت على التوقيت السليم للاكل والتدريب

وعطيته وقت الراحه والنوم .. بالاضافه الى التطور النفسي اللي يصير له مع التمارين اللي قلناها

والشعور بالامان راح يكون سبب كبير لفتح شهية الكلب .

استخدم الاكل المغذي المليئ بالفيتامينات والبروتينات والكالسيوم .

مثل الدراي فوود .. الوجبات المعده بالمنزل اللي تحتوي على اللحوم والخضار و الحليب قليل الدسم

في الصباح و اذا ما حصلت التطور المطلوب استشر البيطري وتآكد من حبوب الديدان و التطعيمات

واستخدم البروتينات والكالسيوم اللي يوصفه لك البيطري .

بصراحه انا توني افطرت واحس اني ما اقدر اجمع حيل .. فعلا اعتذر عن التآخير واتمنى اني افدتك او

وصلت على الاقل معلومه واحده .. واذا كان لدى الشباب اي تعليق او تصحيح او اضافه

اتمنى انهم ما يترددون باضافتها


و ندعي لك بالصحه والعافيه .. ولكلبك بالشفاء العاجل .
ملاحضه : حاولت ارد قبل هذي المره مرتين ويفصل معي النت ويروح كل اللي كتبته الى ان تطايرت الافكار وتبعثرت الحلول !!