[Gouldian]

اخوي, عن نفسي ما قدرت انتج الجولديان حتى وفرت أعشاش اكبر, و اقصد هالنوعية بالتحديد:



ايضاً الاضاءة مهمة, انا استخدم الـflourescent, هو نفسه اللي يستخدم لأحواض الأسماك و النباتات المائية. الاضاءة تلعب دور كبير في تشجيع الفينج على الانتاج.

و حاول تراقب العصافير اكثر عشان تلاحظ اذا في تفاعل بين اي من الأزواج و لا تخاف من ازعاجهم لأن المطلوب هو مكان مستقر و لكن مش مكان خالي من اي حركة او اي صوت. فشخصياً حققت نجاح اكبر مع انتاج الجولديان لما نقلت زوج لغرفة الجلسة بهدف الزينة و هالغرفة فيها تلفزيون شغال طول اليوم و ناس قاعدين و بعد شهرين تفاجأت بانتاجهم و انتجوا مرتين بنجاح و السر هو انهم تعودوا عالاصوات و خف عندهم الخوف و ما عادوا ينصدمون من أقل حركة مثل بقية الطيور اللي عندي و كل هذي العوامل ساعدتهم في أخذ راحتهم اكثر و بالتالي انتاجهم كان افضل و اسهل.

لكن انتبه, بالرغم انهم كانوا في مكان مزعج الا اني ما كنت ابداً ادخل ايدي في القفص غير مرة وحدة في اليوم عند تبديل الماي و الاكل و ما نقلت مكانهم نهائياً و هذي شغلة اساسية عشان يحسون بالاستقرار. لا تنسى ان الجولديان جداً حساس و لأصغر سبب تلقاهم يهجرون اعشاشهم و صغارهم.

ايضاً انت ذكرت ان 4 ماتوا من الـ11 اللي كانوا عندك, هل كان بسبب مرض او موت مفاجئ؟ و هل المتبقيين يعانون من اي مشاكل؟ في الصور اشكالهم ممتازة و بصحة جيدة لكن يستحسن توضح اكثر.

و هل العصافير اللي عندك يتقبلون الاكل اللي تقدمه لهم مثل البيض او يرفضونه؟

انتظر ردك و اتمنى هالمعلومات تساعدك

بالتوفيق