[mfarouk27]

السلام عليكم و رحمة الله و بركاته

بالنسبة لحكاية الاسهال ديه إسمحوالي أقول رأيي أنا من الناس اللي بتؤمن بإن الحاجات الطبيعية أفيد ألف مرة من الأدوية خاصة إن فيه أوقات كتيرة بتكون الأدوية خطر على القطة ( الحمل – الرضاعة – القطط الصغيرة خاصة اللي جسمها ضعيف ................الخ) و عايز أقولكم حاجة اللي قطته يجيلها إسهال يجرب الوصفة دية و مش هايندم أبداً
بطاطسية متوسطة الحجم + جزرة كبيرة + فنجان صغير رز مصري

1-نقشر البطاطس و الجزر و نقطعهم و نحطهم يتسلقوا في ميه فقط لاغير بدون أي إضافة ولا حتى الملح.
2-نفس الكلام مع الرز طبعاً هايتغسل الأول بس مايتغسلش جامد قوي علشان مايفقدش النشا اللي فيه يفضل موجود.
3- نحطهم على بعض و لازم نحط الرز بالمية اللي فية مانصفيهوش ولا نشطفه بعد السلق إضربوهم في الخلاط .
لو مفيش رز مصري ممكن نحط نص فنجان ميه و ندوب فيه ملعقة صغيرة من النشا أو الكورن فلاور
هاتو حقنة بلاستيك و شيلو السن بتاعها (فيه حقن بتكون 20 سم) ديه كويسة علشان تبقى الكمية كبيرة (لو مفيش أستخدموا المتاح اللي موجود بس طبعاً هاتديها كذا دفعة في نفس المرة).
هاندي الخلطة دية للقطة طبعاً بنفس الطريق اللي كنا هانديها بيها الأدوية إلا إذا كانت القطة أصلاً هاتكله لوحدها بدون ضغط عليها هانفضل نديها الخلطة دية على مدار اليوم و هاتشوفو النتيجة في نفس اليوم و يمكن أصلاً خلال خمس إلي ست ساعات هايكون إنشاء الله الإسهال توقف بس هانستمر لنهاية اليوم
الحكاية ديه مفيدة من كل النواحي
أولاً :- مية سلق الرز بتنضف و تطهر المعدة و الأمعاء و كمان النشويات أفضل حاجة تمسك البطن.
ثانياً :- الجزر من الحاجات اللي فيها فيتامينات عالية جداً هاتعوض القطة اللي فقدته(وكمان مفيد جداً لشعر القطة و نظرها).
ثالثاً :- البطاطس و النشويات عامة هاتوقف الإسهال و كمان هاتخلي القطة تقلبظ.

جربوا و قولولي إيه الأخبار.

***على فكرة ممكن تبقوا تحطوا معاها قطعة فراخ مسلوقة (بدون الجلد وبدون دهون أو ممكن قطعة لحمة مسلوقة خالية من الدهن)