فرس عنيدة، كيف أعيد ترويضها؟
 

السلام عليكم ^^

أنا عندي فرسة عنيدة، وسويت إسطبل جديد خاص وقعدت فيلو فترة يعني اتعودت الفرس على الاسطبل.
أمس كنت أبغا أسرجها وما رضيت توقف، والمصالب لسا ما سويناها، كنت أنا زعلان وقتها أصلا، فسويت عقل صغير وسرت أتعامل معاها بعنف (بس ما ضربتها) وأصرخ عليها وجبت اللنش وجلست أجريها أبغا أتعبها، وأنا ماسك اللنش أنتبهت لنفسي، فهديتها وجلست أسحب اللنش عشان تقرب عندي، لقيتها خايفة ومو راضية تجي، بعدين لما شديتو أكتر جات بس أنا لما جيت أبغا أمسد على رقبتها سارت كل ما تتحرك يدي تخاف وتحاول تبعد عني.

ندمت كتير على معاملتي لها، صح كانت ما تمشي زي الناس لكن مو لدي الدرجة، كمان كنا تونا جايبين حصان عشان التلقيح فامكن يكون هوا سبب عنادها الزايد داكا اليوم، أو إننا دخلنا الفرس التانية اللي كانت مفلوتة معاها.

بعدها جلست معاها فترة وسارت كل ما تجي جهتي تبعد ولو قربت تجي تشم يدي وتروح وأحيانا تتجرأ وتحاول تاكلها، بس ما حاولت انهرها أو أخوفها.

دحين أبغا أنسى كل شي فات، وابغا اعلمها تسمع الكلام وفنفس الوقت ما تسمعو عشان تخاف مني، مع العلم إني ما عمري روضت فرس وخبرتي مو قد كدا بأتعلم، ودي الفرس اللي باتكلم عنها أخوية روضها، وكان يمشيها تمام، بس هوا طبعو يستعمل القوة ويشد اللجام مرة وزي كدا، وانا ما أبغا دا الشي، دحين أخويا سافر وانا استلمت الأفراس وأبغا أخليها بطريقتي.

الله يخليكم جابوني، في أمان الله ^^

رد: فرس عنيدة، كيف أعيد ترويضها؟
 

رد: فرس عنيدة، كيف أعيد ترويضها؟
 

الله يبارك فيك أخي ^^

الفرس اتولدت عندنا وما أزكر إنو سرلها موقف.
كل يوم العصر نفلتهم في البادوك ونحطلهم برسيم وموية.
أعتقد السبب هوا الخوف، إن شاء الله أعمل متل ما قلتلي، لكن أنا أطلع الإسطبل كل خميس وجمعة لأنو عندي دراسة، يكفي؟ ولا حتسير متعودة عالعمال مو عليا "--؟
أنا بأحاول أكتر طلعاتي قد ما أقدر، حتى اليوم حسبت نفسي غبت من المدرسة، فعلى طول قمت أبغا أقول لبابا يوديني الإسطبل :D

"^^

وهما مفلوتين في العصر جبنا الحصان، ودخلنا وحدة فرس عشان نلقحها، لكن الفرس دي (سَبحة، اللي سميتلكم هيا العنيدة) ما عملنالها شي داكا اليوم، الا انها من أول ما دخلنا الفرس التانية بدأت تجري وتنطنط في البادوق وما وقفت مكانها بس رايحة جية.

كويس يعني في تقدم :12:

بازن الله، حسبت إنو مشكلتي من الفرس، بس يظهر إنو المشكلة بس شغلة تعارف ^^

هيا فعلا الفرس حارة، وزمان ما كانوا يرضولي أركبها يقولوا هدي حارة تطيحك "--، إزا كان لازم أكون صارم، أتمنى تقلي كيف يعني أكون صارم؟ يعني زي أخوية أصرخ عليها وأشد اللجام مرا لما أركب وكدا؟ بس كدا حتسير تتعامل معايا كند وعدو مو صح؟


ومررررا شكرا أخوية شرقاوي على المعلومات المفيدة ومساعدتك الدائمة للأعضاء الله يخليها فميزان حسناتك إنتا والأخت نهى، وإن شاء الله تضلو دايما في المنتدى عشان تساعدونا :p

في أمان الله ^^

رد: فرس عنيدة، كيف أعيد ترويضها؟
 

رد: فرس عنيدة، كيف أعيد ترويضها؟
 

بإزن الله أفرض شخصيتي عليها :cool:

لكن في سؤال مستقبلي، دحين بإزن الله لما الأفراس يولدو، ما أبغا بناتهم يسيروا زي سَبحة، في أفراس تانية مو حقتنا أتعامل معاها وتتعامل معايا عادي جدا مع إنها أول مرا أشوفها (صح تجلس تشم يدي وكدا لكن ما تكون معصبة زي سَبحة)، كيف أخليها إجتماعية زي كدا؟، مع العلم إنو أنا اللي حأروضها بإزن الله.

وسؤال تاني، أنا شفت موقع مونتي وشفت برنامج لو على دبي ريسينج، هل في مواضيع على المنتدى تشرح لغة الجسد اللي هوا بيستخدمها وروض بيها حصان مستنغ بري فتلاتة أيام وقدر يركب على الحصان ويمشي كأنو حصان عادي؟ إزا كان مافي أي مصادر عربية، هل تعرف مصادر إنجليزية وأنا ممكن أترجمها، لأنو فموقعو شفت إنو مسوي جامعة بس ما شفت دروس تشرح طريقتو بس في فيديوهات وهوا بيطبق الطريقة بس بدون شرح.

وعزرا على كترة الأسئلة "^^، وآريغاتو غوزايماس على مساعدتك، في أمان الله ^^

رد: فرس عنيدة، كيف أعيد ترويضها؟
 

شكران على المعلوماتظ