اليوم فقدت مووني وصارت ذكرى لا تنسى..

[توتي]

السلام عليكم ورحمة الله وبركاته

ما عرف كيف اعبر عن شعوري او اخبركم المصيبه اللي صارت لي اليووم.. يمكن الناس المووجدين في هالمنتدى والمربين يحسوون فيني اكثر.. مع انه اهليه ما قصروا فيني..

اليووم من اصبحت الصبح وانا احس انه في شي بيصير.. كنت متضايقه طوول ما انا في الدوام واول مره احس انه الوقت ما يمر.. اعد الثواني والدقايق والساعات.. وعيني ما نزلت عن الساعه..

رجعت من الدوام ومن عادتي اني اول ما ارجع اطل على طيوري حبايبي واطلعهم برا في الحووش الانه الجوو صار حلوو واعتدل واتحسن.. ومرات اقعد معاهم برا اقرأ قرآن وهم وياي واشوفهم مستانسين وفرحانين.. ومرات انام من التعب لما ارجع من الدووام وهذي حالتي من جانا رمضان..


المهم.. انا اليووم نمت وليتني ما نمت.. بعد ما وصلت من الدوام طلعتهم كلهم وكل حد في قفصه.. موني وعشبووه وكوكو.. ومن التعب وكنت احس بضيق اليووم غير طبيعي.. رحت انام الاني كنت متضايقه.. ونمت بعد صلاة العصر.. وقمت على المغرب ونزلت وفطرت وكل شي وجالسه عادي وما انتبهت على طيوري الا بعدين وينهم يا ربي انا دايما اوصي الخدم من يأذن المغرب يدخلونهم الانه الاقفاص كبيره ومحتاجه حد يشيلهم..

شفت عشبوه وكوكو لكن موني محد.. طلعت برا والا اشووف القفص خالي.. قلبي يعوني وانا اكتب ومش مصدقه اللي صار.. احس اني احلم.. وليته حلم.. سألت الخدامه وهاي عندنا من زمااان وتعرف شكثر انا احب طيوري اشوفها انه شي صاير ..وسألت الثانيه بعد استهبلت.. والثالثه وشفت وجها مقلووب قالت لي انها راحت تغير له الاكل وما لقته يوم رجعت الانه حضرتها تركت الباب الجانبي الخاص بالاكل مفتووح والظاهر انها طارت.. ولما رجعت دورت في الحووش ما لقت شي.. وهالخدامه ما كمللت عندنا شهرين يعني جديده.. والله اعلم اذا هالكلام صحيح ولا كذب.. وما لقت حد تخبره الانه بيتنا العصر يكون فاضي.. وبعدين خبرت امي بعدها بوقت طويل.. وامي هزبتها وقعدوا يدرووون كلهم وما لقوها..

هذيك الساعه ما قدرت اتكلم ولا اقول شي كل اللي سويته اني سكت ورحت غرفتي وقلبتها صيااااح وبدون تفكير وما كنت اعرف شسوي بذيك اللحظه.. ولما عرفوا خواتي واخواني كلهم باللي صار طلعنا كلنا ندور في البيت وامي تقوول دورناها وما لقيناها وانا ادور والله كنت اتذكر نفس الموقف يوم كنت ادور على توتي وما لقيتها وانا يائسه احس اني ما بشووف موني للأبد وبنفس الوقت اكذب على روحي واقول موني بترجع او بتلقينها عن الجيران.. وطرشت الطباخ بيوووت جيرانا كلهم.. سبحان الله نفس القصه يوم ويا توتي الحين تصيير وياي ومع مين مع موني اللي كملت عندي اكثر من سنه.. كانت تنادريني بأسمي.. وكانت لطيفه.. اللعب معاها وامسح على راسها.. كنت لما اتضايق اجلس معاها.. وتعلقت فيها بشكل فضيع.. ما بقى شي غير صورها والقفص الخالي اللي مش قادره اشوفه وكل ما اشوفه ابكي من الخاطر..

لكن ما قدرت اهزأ الخدامه كل ما اجي اصارخ عليها تسبقني دموعي واسكت.. وهيه تشوفني وتصيح وتتأسف.. ما اقدر اسامحها على اللي سوته.. جاتني للغرفه تعتذر.. وجايبه لي 100درهم تقول لي اشتري فيهم طير ثاني وانا سوري.. هزأتها وخذت الاميه وفريتها في وجها وقلت لها هالطير يساوي اضعاف راتبك.. قهرتني قهر اليووم..

ليش اتذكر موني..؟؟ ما اقدر انساها موول.. حتى نظرتها لي.. يووم تلعب.. ويوم تناديني.. ويووم ويووم ويووم.. يا حسرتي..كنت احس انها تفهمني مرات.. كنت احس انها تحس فيني.. بس ليش تركتني؟؟.. اتذكر كل شي من اول يوم جابلي اياها اخوي.. من فرحتي نومتها عندي في الغرفه.. والحين وينها يا رب رجعلي موني.. عندي امل لكن ضعيف انها ترجع.. ادعوا وياي ارجوكم.. تعلقت فيها بشكل مو طبيعي..

من اسبووع تقريبا اشوفها تطير في البيت وكنت اقوول بقص جناحها االانه طول.. وسبحان الله.. شوفوا اللي صار..

اكتب وكلي حزن واحس انه الدنيا مقلوبه.. احس بشي بداخلي كأني فاقده ولدي... والله هالطير كان بالنسبه لي شي ثمين لما اهداني اياه اخوي بعد ما طارت عني توتي.. والحين وينه الله اعلم.. رحل عني وطااار..

وانا كل ما ا تعلق في شي واحبه يضيع مني.. لي متى؟؟؟ حزينه وما اقدر اهدي روحي.. والشكوا لله.. وادعي من كل قلبي انها ترجع.. والحمد ا لله على كل حال.. ما اقدر اقوول غير قدر الله ما شاء فعل..

ادعوو وياي بارك الله فيكم.. انا خليت القفص مكانه ما حركته..

[افريكانو]

الله يردها لكي بالسلامة و الله يعوضكي بزيها او احسن منها و الله اني حزين و مقدر شعورك لني مريت مثل هذا الموقف مرات كثيرة بس الحمد الله كل مره القاه

[كاسكو البحرين]

الله يعوضك على طير احسن منه إن شاء الله

[Luis]

اختي توتي لايكون املك ضعيف...

خلي املك بالله قوي...وان شاء الله بتتذكرج بعد يوم يومين...

وبترجع فوق القفص...فالمكان اللي ربت فيه وحبت اهله...

فالمكان اللي دوم حست فيه بالأمان والطعام موجود عندها بالدوام...

يمكنها طارت قريب حبت تحرك جناحينها والله أعلم...

وانا حاس باللي انتي حاسته اختي...

وسبق ومريت بهالأزمة ومازلت...مع حبيب عمري واللي مافكرت يوم بالتخلي عنه...(لويس)

انا اللي بعته بيدي وماكان هالشي يرضيني ولو بمليون ريال بس الأهل منعوني وعورني قلبي..

واليوم من أروح مكان بالسطح او بالغرفه او بالصاله وانا جالس تذرف دمعتي من غير شعور...

اتذكره لما كنت انزله يستانس ويتمشى ويلعب مع اختي الصغيرة....

ولما اطلعه فوق عن الوالد مايحمق علي وعليه...اطالع بعيونه واشوف نظرات حزن عليه...

وانه مايبيني اطلعه فوق لأنه بيجلس لوحده او بيجلس مع سالي..وهو يبي يجلس معي...

بس الحمد لله على كل حال...والله يعوضني ان شاء الله وينسيني...بس مثل لويس ماراح اقدر انساه لو اموت......

الله يرجلعج موني بالسلامه ان شاء الله وتفرحين ابها مرة ثانيه....ومردها بتقلق وبتشتاق

ان شاء الله وبترد لج...

تحياتي لج...وخلي املج بالله قوي...

[Moz3ej]

لا حول ولا قوة الا بالله

الله يردها لك بألف سلامه يارب ..

قصتك تعور القلب والله .. الله يصبرك وترجع قريب ان شاء الله

[عاشق المكاو]

لا حول ولاقوة إلا بالله ...
إن شاء الله وبإذن الله يكون قريب منك ويعود من احد الجيران فأنا متأكد لن يطير بعيد ولكن على الله يكون عنده شوية إيمان الي بيكون معاه ويدور على صاحبه فأنا أذكر ان احد اصحابي حصل على طير أمزوني ومتكلم واستغربت فهو لايربي الطيور ووضح لي انه صاده وللأسف مادور على راعيه وبالأخير مات عنده ...
وانا مابي ازيد عليك المواجع اختي توتي ولكن انا متعود على ان مافيه أحد يقوم على طيوري وعنايتهم غيري انا من زمان سواء في الأكل أو الترويش وحتى لما اطلع امشيه برا ولا أعتمد على احد نهائياً غير اني أوصي الخدامه تنتبه له وتبلغني يمكن انسى ماحط له اكل او مويه أو لاحظتك لاقدر الله انه تعبان وهذا درس لك والأهم من هذا ثقي بالله في رجوعه وإذا مارجع أعرفي ان الله بيعوضك بطير احسن منه ...
خلي املك بالله اختي ..

[صويب الرمش]

موقف صعب وخاصة مع طائر مقرب لك .. لكن انصحك بالصبر ...

و لكن بغيت أسألك الطائر موالف مع الناس ولا لا ؟ يعني هل هناك امكانية ان احد يمسكه مثلاً ولا لا...



اذا كان فيه امكانية اعرضي اعلان عنه في الأماكن العامة و اعرضي بعد مكافأة للي يجيبه إلك وان شاء الله يرجع لك الطائر...



انا فقد طائرين من افضل الطيور عندي وأغلاها ...

واحد طار قدام عيني وراح في منطقة غابات معزولة من الناس يعني ما فيه امل احد يلقاه ...ولا فيه أمل يرجع بعد ...


والثاني طار من فوق يدي وطار الى نص البحر وطاح لأن جناحاته توها طولت وما قدر يكمل الطيران و كان في منطقة بعيدة وما طلعة لي الا غواصين خفر السواحل وهو خلاص في الرمق الأخير ومات بين أيديني ... وكان هذا الأخير هو اشد الامور المحزنة اللي مرت علي في تربية الطيور ...


حتى اني فكرت بالأبتعاد عن أقتناء الطيور لأني حسيت بالنذب ...


لكن الحمد لله عندي الآن ثلاثة و اقص جناحاتها بصورة دورية ...




ان شاء الله الله يرده لك بس حاولي تحطين اعلان بالمجمعات القريبة منك و حطي مكافأة أغلى من سعر الطائر على شان تطمع اللي يلقاه انه يجيبه لك بدل ما يبيعه ...


واذا ممكن ترسلي لي صورة له أو نوعه وأنا اصمم لك اعلان له و حددي لي المبلغ اللي تبين تحطينه مكافأة ...


الله يرد لك ضالتك...
الله يرد لك ضالتك...

[محمد يوسف]

ان شاء الله يعوض عليكى

[توتي]

دورنا اليووم عليها بعد.. لكن ما لقيناها.. انا خايفه عليها من القطاوه.. اتمنى انها تكوون في مكان آمن.. لكن كيف بتاكل؟؟ كيف بتتحمل الشمس الظهر.. ؟؟ يالله احس انها ازمه.. الله يستر بس.. مليووووووون شي براسي..

يا ترى لو حد صادها بيرعاها عدل؟؟ وبيعرف يعتني فيها؟؟ اتمنى هالشي ادعوا وياي بليزز..

مشكورين كلكم على وقفتكم وياي.. وردودكم.. مع انه اخويه قال لي بوديج السوق واختاري اي طير يعجبج.. وان شاء الله بروح وياه في الويك اند وبدور لي على فرخ رمادي اربيه من يوم ما هو صغير الانها امنتيه.. فديت اخويه والله..

وشكرا للجميع..

افريكانو.. شكرا على هالوقفه الطيبه يالطيب..

كاسكو البحرين.. اشكرك على الرد..

لوويس ونعم بالله.. الحمد الله انا مؤمنه بقضاء الله وقدره لكن سبحان الله لازم الانسان يحزن على الشي الغالي اذا فقده.. شي خارج عن إرادته.. وموني كانت غاليه بالنسبه لي.. والله يوم اني ففكرت ابيعها الكل وقف بوجهي وقال (لا) هاي هديه من اخوج وانتي تحبينها وهيه متعوده عليج كيف تتجرأين.. وتراجعت عن هالخطوه مع انه ظروفي كانت تجبرني اني ابيع طيوري كلهم..

مزعجج.. شكرا على الموساه.. والله المستعان..

عاشق المكاو.. صار لي كم اكثر من 3 سنوات تقريبا وانا اربي طيور.. ومحد يعتني فيهم غيري.. والخدامات بس مرات يساعدوني في التنظيف وبأمر مني انا.. لكن هاي قهرتني قهر ما اققدر اقول شي.. حضرتها مستاانسه على الطيوري وااااايد ومن كثر ماهي مستغربه مني ومن حبي للطيور قامت تتطعمهم دوووم وتنظفهم وتجلس وياهام.. ولا وتستمتع بهالشي.. ودايما تكلمني عنهم.. لكن هذي ما تنعطى وييهه ولا سالفه.. الله يسامحها بس.. كنت اتمنى لو تكون عند احد الجيران لكن للأسف..

صويب الرمش.. ونعم بالله وانا صابره وان الله مع الصابرين.. موكله امري له.. وراضيه باللي صار.. وعسى ان تكرهو شي وهو خيرا لكم.. ونفس شعورك واكثر اللي احس فيه الحين بفقداني لأغلى طير موني..

محمد يوسف.. العوض على الله.. وتسلم ما قصرت..

كل اللي كنت اتمناه اني القاها مع انه الامل كان ضعيف.. الحمد الله نفسيتي تحسنت عن امس بواايد لكن الحزن موجود في القلب.. والله المستعان..

ومشكورين كلكم يا جماعه ما قصرتوا.. واسمحولي احس اني غثيتكم..

أختكم/ توتي

[راعي اصقور]

عندي الحل حطي في القفص أكل للحمام والبغبغاء مالج وبأذن الله بيجي بيدور على الاكل وبيلقا الاكل وبيجي انشالله