طفشت من طيري .. استفسار

[F-9]

السلام عليكم


لو سمحتوا ابي احد يولف طيري الافريقي والطير لسا فرخ .. يا ليت اللي يعرف مكان يدبون فيه يفيدني لأني ببيعه لو جلس كذا


الطير ذيله مو مرتب ريشه مكسر ما بقى الا ريشتين اللي أوكي .. نزلت موضوع وقالوا اوديه بيطري ينتفه .. السؤال كم يجلس لين يطلع الجديد

والجناح المقصوص ينمو ولا لين يبدل ريشه ؟!


الطير لاحظت انه ضعف شوي عن قبل .. وش اعطيه لأني احسه ضعيف





اهل الخبره افيدوني

[إكليكتوس]

أخوي الريش المنتوف عنوه يطلع بداله ريش جديد لكن يطول شوي وماأقدر أحدد فترة لأنه يختلف من طير لآخر ومرتبط بالتغذية والفيتامينات ووقت النتف وأفضل وقت للنتف هو الصيف ... أما إللي يطيح من نفسه في الفتره الطبيعية لتبديل الريش يطلع في فترة قصيرة اسبوع تقريبا تزيد شوي أو تنقص شوي على حسب التغذية والفيتامينات ويبدأ يطول بسرعه ... أما بخصوص ريش الجناح المقصوص يبقى زي ماهو لين تنتفه

الريش المكسر إنتفه بنفسك بحيث تمسك الطير بفوطه وتحط صبعك على جذر الريشه وترص عليها وبيدك الثانيه تنتف الريشه بسرعه البرق ....... بعدين إشتر فيتامين MUTA-VIT حجم 25 جرام بـ 35 ريال (جربته شخصيا ممتاز لكل الطيور وهو عبارة عن 14 نوع فيتامين وأحماض أمينيه ومواد أخرى عديدة) عباره عن بودره ينحط مع ماي الشرب ويجي معاه ملعقه صغيره....... والتعليمات بجميع اللغات إلا العربي مع الأسف ........ لاكن خذ العلم والترجمه من عندي :

ملعقه وحده تحطها في (250 مل) ماء شرب يعني بالضبط علبة ماي أبو نص ريال وترجها زين ...... وتختار وش تبغى الفيتامين يسوي لطيرك

1- لتحفيز إنبات الريش في فترة تبديل وحذف الريش :
تحط له 3 مرات في الأسبوع .... السبت - الأحد - الإثنين - الثلاثاء - الأربعاء - الخميس - الجمعة

2- للذهاب لمعارض ومهرجانات الطيور (( الأجانب عندهم كذا ... منافسات وتقييم وجوائز )) :
تحط له 4 مرات ...... تحط يوم وتترك يوم

3- بعد إجراء أي علاج للطير بمضادات حيوية أو أي علاج آخر (( طبعا الأدوية لها تأثر على الطيور )) :
تحط له 5 مرات ...... تحط يوم وتترك يوم

4- فقدان الشهية بسبب خلل في الأيض
تحط لمدة اسبوع كامل كل يوم


تنبيهات عامه :


- يوضع المسحوق في ماء شرب حلو وليس ماء البزبوز
- في الأيام التي تضع فيه المحلول يجب عدم ترويش الطير وإبعاد أي ماء آخر ماعدا المحلول
- يفضل وضع المحلول للطير في الصباح
- عندما يتبقى كمية من بعد إنتهاء اليوم المحدد يجب سكبها وعدم إعادة إستخدامها
- لاتضع قفص الطير وبه ماء المحلول تحت ضوء الشمس المباشر

(( في كل الحالات نتائج قدرة الطير الجنسية -الإنتاج- تزيد سواء كان ذكر أم أنثى ))



أما بخصوص ترويض الطير ولا أسهل منه ........ لكن هذا شي راجع لك ولمدى صبرك وتفرغك ........ حط في اليوتيوب (ترويض البغبغاء) + (تدريب البغبغاء) وبتلقى فيديوهات مبسطة بالعربي



أتمنى إني أفدتك


وبالتوفيق

[F-9]

مشكوووووور وما قصرت ..
كم اجلس استخدم هالفيتامينات ؟!

أنا مابي الطريقه قريت كثير بس أنا ودي حد يولفه وين اوديه ؟!

[zxooozx]

السلام عليكم
اخي الكريم لاتستعجل وتسوي شي من راسك ارجوووك
اولا: لازم تعرف ريش الطير وش اسباب تكسره او نتفه حيث هناك اربع اسباب رئيسية:
1-تساقط طبيعي لان الطير كل سنة يبدل ريش وهذا معروف لدى اصحاب الخبرة.
2- تساقط بسبب مرض عضوي بالطير نفسه وهذا له علاج حسب السبب.
3- نتف من الطير نفسه بسبب حالة نفسية من قلة العناية به او ضغوط من البيئة اللي حوله
4- حد لاعب بريشة من نتف او تكسير او من مسك غلط للطير.
نصيحة قبل تسوي شي من نفسك تودي الطير للبيطري خل يشوفه ويحدد السبب افضل لك

نتف الطير بنفسك مانصح حد فيه من غير خبره لانه ممكن يسبب نزيف حاد للطير او يخرب مكان منبت الريشة وماتطلع مره ثانية.

اما بخصوص ترويض الطير
المتعة الحقيقية انك انت تروض الطير بنفسك منها تتعلم الصبر ولما تنجح راح تحس بقيمة تعبك والطرق كثيره اللي تعلم المبتدئين منها هنا بالمنتدى ومنها مقاطع على اليوتيوب
ويمكن حد من اهل الخبرة قريب عليك يساعدك بالموضوع ولكن بكل الحالتين الطير مطلوب منك وقت وجهد وصبر واذا كان ماعندك استعداد تفضي نفسك للطير فكل تعبك راح يضيع لانه بكل بساطة الطير حتى لو مدرب راح يخرب طبعة لو اهملته معنى هذا ان الاحسن لاتظلم نفسك وتظلم الطير معك

ارجو ان يكون كلامي مفيد وغير ثقيل عليك لكن الدين النصيحة
دمتم بود مع اطيب التمنيات

[F-9]

مشكوووور اخوي عالنصيحه .. صح أنا ما فكرت ان ممكن يكون فيه شي

بس الاغلب لانه كان بقفص صغير لما كان يتحرك ذيله يدخل بين الأسلاك وكذا
أنا أشوف ان هذا السبب و بتاكد ن البيطري أحسن

بس ما جاوبتوني للحين كم يجلس لين يطلع ؟! شهر شهرين ولا
والمكان اللي يولفون فيه للحين محد رد