احس ان الطير تعقد .. هل تعتقدون هالشي بيأثر عليه ؟

[chico]

السلام عليكم ورحمة الله وبركاته


اخواني بقولكم سالفتي مع الطير الي عندنا


من 6 ايام ... اشتروا بيتنا ببغاء امازوني نيبالي ... وجنسه انثى ... الي منقاره احمر


المهم جابوها وخليناها داخل في المطبخ ... مكان هادي مايكون فيه احد الا وقت الوجبات .. والتلفزيون هناك دوم شغال بس على صوت خفيف


وبعد يومين ... طلعووها من المطبخ .. وقالوا بنوديها الصاله الي كل البيت يقعدون فيها عشان مايصيد الطير توحد <<<<< تخيلوا انتوا الوضع .. طير جديد ماتعود وودوه الصاله مع الناس والازعاج


الطير اول ماجبناه .. كان اليف يخلينا نمسكه .. وانا ماعرف عمرها الصراحه ... عقب ماوديناها الصاله صارت متوحشه وما تخلي حد يقرب منها .. وتعض اي حد يحاول يمسكها


تمت على هالحاله 5 ايام ... انا هني قررت اني اقرا عن طريقه تربيه الببغاوات بما ان محد متكفل فيها .. كاسره خاطري حاطينها ووولا حد معبرها .. ومحد يكلمها بس اليهال يبون يمسكونها .. يعني كأنه جايبينها بس زينه .. انا قلت بتكفل فيها وبدربها وبهتم فيها وان شاء الله بعلمها الكلام بعد .. لان كاسره خاطري


قريت وايد عن طريقة تربيتهم .... وبقولكم شسويت


خذت الطير ووديته غرفه هاديه ... مايدخلونها وايد اهل البيت ...وقلتلهم خلوها هالفتره ولحد يحاول يمسكها ... الغرفه الاضاءه فيها خفيفه ... والغرفه الحلو فيها انها كلها شبابيك وتدخلها اشعه الشمس بشكل حلو


المهم ... قعدت معاها فتره بس اكلمها واحاول اتكلم بهدوء ... ومسكت عصايه طولها يمكن 30 سانتي ... هالطريقه قريتها فالمنتدى ... فالبدايه كنت لما اقربها منها تعض وتخاف... تمت على هالحاله فتره يمكن قريب الساعه ... و كل ما بغت تعض اقول لها لا ...


وطلعت ورجعت بعد فتره... عقب كررت نفس الشي ... لين ماسمحت لي ان احرك العصا بخفه على منقارها ... وهني عطيتها مكافأه ... عطيتها اكله جديده وهي الخيار خخخخخ ... ماكنا ماعطينها من قبل ... والمفاجآه انها كلت الخيار من يدي ... يحليلها فرحتني


وصارت تعرف كلمه لاء .. عقب خليتها .. وسميتها شيكو وصرت اناديها باسمها واصفر ... وامسح العصا على جسمها بعد جهد لانها كانت خايفه ...


وتميت طول اليوم اطلع وارجع لها بعد فتره .. وصارت تخليني اقرب يدي وامسح على ظهرها ... بس وهي مب منتبهه .. يعني اسوي نفسي اني امسح بالعصا وبهدوووء امسح بيدي مع العصا .. لكن لو تنتبه تحاول تعض ...


هاي هو يومي الاول معاها .. والحمدلله احس ان في تقدم ... صارت شوي مرتاحه .. وتقبلتني وخلتني امسكها ... وكلت من يدي ... وصارت تعرف اذا قلت لا يعني شي ممنوع ..
ماشاء الله


بس عندي سؤااااال


شيكو من اول ماجبناها وهي ماتصفر ولا تصارخ ولا تطلع اي صوت ... هل هذا شي طبيعي ؟؟؟


ومتى تتوقعون بتبتدي تتكلم اذا هذا تجاوبها معاي وهذي طريقتي .. وشنو تنصحوني بعد اسويه معاها عشان انسيها الفتره الاولى الي مرت فيها لما جات البيت ؟؟


افيدوني من خبرتكم وبكون شاكره لكم

[حسين المادح]

مرحبا

اخوي بالنسبة للي سويته فهو ممتاز وعين العقل والله يجازيك خير عليه .. لأنه ابعدتها عن الخو والفوضى
واتمنى انك تواصل مشوارك معاها بصبر وروية وتقرأ في موضيع تدريب الببغاوات اكثر

واحب اقول لك لا تستعجل لأن الببغاء يحتاج اشهر للتأقلم لا ايام ولا اسابيع

انا الكاسيكو مالي جبته أليف ويركب على يدي لكن احسه يخاف مني لأني وجه جديد عليه وتم شهرين وتوه ابتدى قبل اسبوعين يكون طبيعي 100 وقام يتكلم ويعطيني بوسة وحركات ويقول " بعد شحوال "

فلي أتمناه منك انك تصبر عشان تنال إلي تبيه

وبالنسبة للسكوت الطائر .. فهل إلي افهمه من كلامك انها من اول ما دخلت البيت ما سمعت لها ولا صرخه ولا صفره بسيطة أبداً؟؟ لأن بعد الطيور تجي غتمة للأسف .. أتمنى تتأكد من هالشي

وبالتوفيق

[chico]

مشكور اخوي على ردك

يالله يجزيك كل خير

وبس بغيت اوضح .. ترا انا بنت مو ولد

وبالنسبة لسؤالك

اي نعم ... ولا مره سمعت لها حس او صرخه او صوت ... ولا شي ... والي اقراه دايما من المواضيع ان اغلب الناس يكونون متأذين من صراخ الطير ... خاصة الامازوني

يعني تعتقد انه غتم ؟؟؟

وشلون اتاكد من هالشي ؟

[افريكانو]

و عليكم السلام ورحمة الله و بركاته

بصراحة انا ما عرفت نوع الببغاء امزوني نيبالي و منقاره احمر ؟؟

بس بصراحة حلو ان قررتي تهتمين في الببغاء بس ممكن صورة للببغاء

[افريكانو]

هل تقصدين هذا الببغاء

هذا الدرة المطوقة(الهندية)

[روهلات المعالي]

ماشاء الله عليك اختي

يارب عقبال الي عندي يتعوذ من ابليس ويتآلف معي

[chico]

هلا فيكم اخواني

والببغاء الي عندي مثل هذا



هذي صورة حصلتها في النت ... مب ببغائي ... لكن هو نفس شكله بالضبط

واخواني مثل ما قلت لكم المشكله عندي مب انه ما يتآلف

عادي بنطر عليه لين ما يصير اليف اكثر ..

لكن مشكلته لا يصفر ولا يصوت ولا يصارخ ولا سمعت له حس ابدا ابدا من اول ما دخل البيت ؟؟؟؟؟؟؟؟؟؟؟!!!!!!!!!!

هل ممكن يكون غتم مثل ما قال اخوي حسين

وشلون ممكن اعرف انه غتم وما ينطق ؟؟؟

افيدوني جزاكم الله خير

[الحور11]

أخي العزيز ...

هذا النوع من الببغانات يسمى الدره ولكني لا أعرف نوعها لأن منها ( الهنديه , النيباليه )
وقد يكون هناك أنواع أخرى لا أعرفها .... ولا يسمى بالأمزون .



تحياتي .

[chico]

المشاركة الأصلية كتبت بواسطة الحور11

أخي العزيز ...

هذا النوع من الببغانات يسمى الدره ولكني لا أعرف نوعها لأن منها ( الهنديه , النيباليه )
وقد يكون هناك أنواع أخرى لا أعرفها .... ولا يسمى بالأمزون .



تحياتي .

هلا اخوي


بالنسبه لنوعه ... راعي المحل قال لنا ان نوعه امازوني نيبالي ... وهو من نوع الدرة المطوقه والجنس انثى


عاد مادري انا ... انا قلت الكلام الي قاله لنا