أشكر الجميع ولكن مازلت احتاج النجدة

[jamjoom]

السلام عليكم ورحمة الله وبركاته

أعزائي الأعضاء...

أولا أود أن أشكر جميع اعضاء هذا المنتدى الرائع على كم المعلومات الهائل والمفيدة. وبالأخص الاخوان المحترفين.

و أنا من الناس المتابعين للمنتدى بس اليوم سجلت فيه عشان اقدر ارسل هادي الرسالة

المهم عشان لا اطول عليكم

أنا عندي امازون بلو فرونت اسمه ونيس. اشتريته في اجازة الحج اللي فاتت وعلى حسب كلام البياع ان عمره سنة ونص يعني المفروض الان يكون عمره حوالي سنتين مع اني شاكك في البياع و شكله اكتر من سنتين.

نخش في المهم.

ونيس.. اه من ونيس

مجنني و متعبني و معورني كمان

حاولت معاه جميع الطرق اللي قلتو عليها واللي ما قلتو عليها و برضو ماهو راضي لا يولف مجرد يولف ولا هو راضي يتكلم ولاهو راضي اي شي

قريت في كتاب استعرته من أول ما اشتريت ونيس ما أذكر اسمه ولا مؤلفه وطبعا كتب ان لازم في البداية اولف الطير على المحيط الجديد و ااكله كويس وحاطط انواع الاكل وحط القفص عند شباك مطل على منظر جمالي و الى اخره. الين وصلت عند نقطة حيرتني شوية. اللي هي

اذا بغيت الببغاء ان يتكلم فلا تخرجه من القفص و حاول تكلمه بكلمة وحدة وحط تسجيل يكرر الكلمة و..و.. الخ اما اذا بغيته يولف عليك فحاول انك تأكله بيدك و...و..و الخ

فطبعا قررت اني اعلمه الكلام اول عشان برضو ذكر في الكتاب ان اذا تعلم يولف و يخرج من القفص فحيكون من الصعب جدا تعليمه الكلام.

المهم سمعت كلام الراجل و قعدت على الحال دا لمدة اكتر من شهرين و ما استفدت اي شي
لا نطق ولا حتى هدي بل بالعكس اتجنن اكتر (على كلام المدام انه 3 ساعات في اليوم و هو بس يسمع كلمة بابا جننته). طبعا اتجنن كيف؟؟ صار طول الوقت يطالع في الشباك و يبرم في القفص يحاول يخرج و طول الوقت معصب يكب الموية و يرمي الاكل ويعض على القفص ويصرخ وكدة من دي الافعال الجنونية.

و بعدين لجأت لأحد الخبراء فقال لي بعده عن الشباك و جوعه عشان يهدى مع الجوع و يبدأ ياكل من يدي. فطبعا نفذت الكلام دا والنتيجة ان هدي كتير و صار ياكل من يدي
ولكن المفاجأة كانت ان في يوم وليلة بدون اي تغيير في الروتين وانا اذكرها تمام
كانت ليلة جمعة قمت عشيته كويس بيدي ونمت وصحيت صباح الجمعة و انا ابغ افطره لقيته شخص تاني. رجع اتجنن تاني و ما يرضى ياكل من يدي ابدا مهما حاولت لدرجة اني سبته الين السبت الصباح و هو برضو ماهو راضي يعني يوم كامل بدون اكل و برضو ماهو راضي (وبصراحة مارضيت احطله اكل عشان لا يحس اني استسلمت بسبب صراخه) وصار يا جماعة لدرجة ان الاكل في يدي قدامه و هو يجلس يهز في راسه و يخبط راسه في القفص و يعض اي شي قدامه بقوة و هو يزعق. فسبته الين هو استسلم وقرب عشان ياكل من يدي بس الحركة اللي سواها حركة عظيمة و هي بدل ما ياخد الحبة من يدي اخد اصباعي وعلى كدة انا وهو الين رجع ياكل من يدي.

بعدها قلنا ننقز على الخطوة التانية و اعلمه ياكل بالاوامر (مازبطت)
حاولت اولفه على طريقة الاخ سكر (مازبطت)
حاولت اولفه على الطريقة اللي هي بالعصاية (مازبطت)
حاولت امنعه ان يعض زي ما قاله الاخوان بالعسل والخ (راح اصباعي)

وطبعا المحاولات السابقة ما جربتها وحدة مررة بس بل بالعكس عدة مرات ماعدا حركة العسل بصراحه.

فارجوا منكم افادتي ايش اسوي فيه و قد ايش يبغالي اصبر عليه و كيف اعرف عمره لاني قلت امكن يكون كبير وبالغ ويبغ يتزوج عشان كدة متجنن (الله اعلم)

انا اتمنى اني اقدر اعلمه مع العلم ان هادا اول ببغاء اشتريه و احاول ادربه

اسف على الاطالة و شكرا

[/CENTER]

[al-m7taar]

يشرفني اني اكون اول واحد يرد عليك
اخوي قص جنحانة
وطلعة من القفص وحطة على استاند
وتقتدر تستفيد من هالرابط


http://www.2zoo.com/vb/showthread.php?t=110761

[سماوي الجبه]

لو تشتري له قفص صغير جدا ،، وتعطيه لاطفال يشيلونه من مكان الى مكان واهم شي يحافظون عليه يعني مايعورزون الطير وباذن الله بيتغير ويصير الليف،،

[jamjoom]

مشكورين يا اخوان

[jamjoom]

المشاركة الأصلية كتبت بواسطة al-m7taar

يشرفني اني اكون اول واحد يرد عليك
اخوي قص جنحانة
وطلعة من القفص وحطة على استاند
وتقتدر تستفيد من هالرابط


http://www.2zoo.com/vb/showthread.php?t=110761

أبشرك طلعته من القفص وحطيته على الاستاند وقعدت ااكله بيدي و احاول احسس عليه غصبا عنه الين صار يخليني احسس عليه بس يقرقر و انا احسس

والله يعيني على الباقي من الخطوات

[in my dream]

الطيور يبيلها ساعه صدر وطوله بال لانها مزاجية اذا ارتاح لك بتشوف النتايج انا من فترة طويلة شريت افريقي مايجعر بس يعض ولا يطلع على اليد وجلست فترة ثلاث شهور لاين وصرنا حبايب

[رحماك ربي]

الصبر مفتاح الفرج اخوي.

وحاول تقضي وقت اكثر معاه بس شكله عنيد الله يبارك فيه.

[NAHHAS]

اخوي الامازوني بحب الصغار كتيير اذا بتقدر تخلي شي طفل ما يخاف منه يلعب معاه ورح تلاحظ فرق كببير

[jamjoom]

مشكورين يا اخوان
و ان شاء الله اكون من الصابرين و المثابرين

بس عندي سؤال.. انا احتمال كبير اكون مسافر الاسبوع القادم
فراح اكون مضطر اني اودي الببغاء عند اختي

فالسؤال... هل حيتغير مرة ثانية و يخاف و..و... عشان اتغير عليه المكان والناس؟؟؟؟

جزاكم الله الف خير

[in my dream]

اكيد يتغير عليه المكان والناس بس اهم شي حرصهم انهم مايجية اطفال ويخوفونه ويحاولون يبعدون عنه يعني الافضل يحطونة بمحل مرتفع عن الارض يكون احس له