العنف عنا .....في سورية لوووووووووووول

[سمارتي]

خاص بالسوريين

بلا فضايح.................




العنف منذ الصغر


أول درس في العنف لما كنا صغار هو غرفة الفيران...وكانت أول درس في ثقافة العنف المكتسبة .. الغرفة الوهمية إلي كانو يهددونا فيا بالمدرسة يعني كلام الانسة إللي بدي أسمعو عم يحكي بدي حطو بغرفة الفيران ( جب الفار )

كمان العنف النفسي اللي كان يمارس من قبل الأهل

يعني الكلمات اللي كنا نسمعا دائماً

مثلاً : والله لأفرمك - والله لكسرك - بدي كسر ايديك - بدي اقبرك - بدي أهري نعمتك - اذامابسلخ جلدك عن عضمك ..................الخ

في مصطلحات عنف كانت تعتمد على الطب

والله لشيل عيونك - والله لطير راسك - والله لخلي الدكتور يعطيك أبرة- والله لأقرف رقبتك وحملك ياها - والله لأقص أصبعك ( أو لسانك أو إيدك ) لا فرق

في عنف مشتق من الكلام الوطني

والله لأطرأك كف خلي سنانك تمشي مسيرة قدامك

في عنف مشتق من الحيوانات

والله لخليك تقاقي ماتلاقي - والله لخليك تعوّي متل الكلاب-اطرئك كف اقلبك جحش

وفي عنف رومانسي

والله لفرجيك نجوم الضهر( اللي صارت معروفة عنا أكتر من نجوم الليل)

في عنف دبلوماسي أكيد عرفتوا

هو هديك اللحظة اللي بيجي فيا الوالد الكريم حامل معو صحن سيكارتو وبيقلنا: تعال بابا نتناقش بهدوء اعتبرني رفيقك

وبغباء الابن المعهود منصدق وعند أول اختلاف وجهة نظر بيناتنا"طبعاً بابا"وبس نقول :بس يا بابا هدا رأيي....

بيطفي الوالد سيكارتو وبيطفي وجهة نظرنا بكلمة وحدة ولاك "...."صار عندك وجهة نظر !! سماع ولا نص نصيص

كبرت لما صغرت .. طلعت لما نزلت .. بضلك تحت هالـصرماية و مابيمشي غير اللي أنا بقولو أوم ولا !! جيل اّخر زمن .. والله عال

حتى صار عنا عنف باعترافاتنا العاطفية

يعني اذا حبينا حدا منقلو.. تقبر قلبي - تطلع على قبري - أن شاء الله بتكفني - أن شاء الله بتشكل آسي - وغيرو كتير من المفردات الي مليانة عنف

[سمارتي]

مافي ولا رد

[Dr Khaled]

همممممم والله ما بعرف شو بدي قلك
جاي ع بالي قلك ع قصص العنف إللي ذكرتيها

صدقني لأشبحك ع السلم ......

[golden]

والله ضحك مو عنف لوول

كان عندي استاذ فيزيا سوري

اذا عصب يصير ضحك بالصف خخخ

[ميلودي]

ههههههههههههههه مشكورررررة حبيبتي

[عاشقه مجهوله]

هههههههههههههههههه

العنف عندكم باللسان بس نحن بالأيد .. هههههههههه او العقابات

جراسياس ع الموضوع