كلها كم يوم وراح يموتو بسسي ... لا تتاخرو في الرد عشانهم

[dede]

السلام عليكم يا لاعضاء الاعزاء

طلبي ان شاء الله يكون بسيط وما يثقل عليكم

عندي بستين شرازيتين عمرهم ثلاث اشهر ... كل يوم مرضانين و طبعا كل يوم عند البيطري

و هو يقولي ان عندهم فطريات و يعالجهم ... بعد كم يوم يطلع عندهم زكمه و يعالجهم

و بعد كم يوم يطلع عندهم سخونه و يعالجهم ...اما هذي المره عندهم ما يلي :

الانثى عندها بروده في جسمها و مزكه لاقصى حد .. قبل كم يوم كانت مسخنه

اما الذكر عنده زكمه و فطريات

طبعا وديتهم عند البيطري و اعطاهم ابر ... وقال هذول اذا ما اعتنيتو بيهم احسن ارموهم في الشارع و همو يدبرو نفسهم

بس والله انا مدلعتهم دلع و طول الوقت معاهم و طول عمري اربي حيوانات ... يعني الدكتور ظلمني

البسس مو راضيين ياكلو شيء بالكتير يشربو مويه ... كل انواع الاكل حطيتلهم هيا حتى اني ااكلهم بالقوه بس برضو ماله فايده

ممكن يالخبراء .. من اجل حياة قططي ... ايش ممكن اعملهم

وامس وديتهم عند البيطري و قال اكليهم بس هم مو راضييييييييييييين

ان شاء الله اكون وصلتلكم المغزى

و انتظر ردكم السريع قبل ما يموتو قدامي

[dede]

هذي صوره الذكر لمن كان صفير ( سنه و نص )




وهذا لمن مرض يعني قريب ثلاث شهور ... بس دحين شكله اخص من كده بكثير






وهذي الانثى وهي صغيره




وهذي بعد المرض الخفيف ...دحين شكلها يقطع القلب





امنيتي الوحيده انهم يسترجعو صحتهم و يعيشو معايا فتره طويله .... ادعولهم

[Withered Rose]

يارب يتشافون بأسرع وقت و الله يطول بأعمارهم يارب


اختي القطط يبيلهم عنايه للاذن لأنهم مصابين بـقراد الاذن والعلاج سهل و لكن الخطورة اذا تركتيه على حاله ..
و بالنسبه للمرض اتوقع المشكله من الدكتور وليس بالقطط لأن هذه امراض بسيطه و شائعة جداً و كل دكتور يعالجها بسهوله .. جربي تروحين دكتور ثاني و راح يتشافون انشالله ..


على فكره الفطريات راح تتعالج من تلقاء نفسها بعد فترة و لكن الافضل العلاج لتسريع الشفاء..

القطط جميله ماشاء الله .. اسمري بالعنايه فيهم و كل شي راح يصير مثل اول واحسن بعد

[dede]

مشكوور على الرد الرائع

والله انا معاك ... المشكله في الدكتور

قبل ما اودي البسه الانثى عند الدكتور كانت سليمه ومافيها شيء

بعد ما رجعتها جاتها كل الامراض الخطيره اللي هادتها اللين دحين

ولمن قلتله قالي انا اعطيتها ابره لانها كانت حتموت من السخونه و المشكله فيك انك ما جبتيها
تاني يوم من بعد الابره لان الابره ترفعلها حرارتها زياده وهذا يدل على سريان مفعول الابره

ايش رايك بهذا الكلام اللي ما يدخل العقل

وكمان يحطها عليا و يقولي ارميها في الشارع يمكن تعيش

الله لا يسامحه اذا كان هو السبب في تعذيب بسسي

بس ياريت تقولولي على طبيب بيطري غيره في جده

هذا اللي اودي بسسي عنده ... طبيب في واحه الحيوان

[SleepyMiracle]

و انا بعد اقترح تغيري الدكتور لأن هذي امراض شائعة عند القطط وعلاجها سهل بإذن الله
بالنسبة للأكل روحي لبيطري ممتاز وخليه يعطيهم ابر تفتح الشهية .. و حاولي تغيري الأكل
سوي لهم اكل في البيت .. دجاج مسلوق من غير اضافات و قطعيه قطع صغيرة و كبدة دجاج بعد ..
والنصيحة الذهبية اللي نعرفها من مشرفنا قطو كويتي .. زيت زينون ثلاث نقط كل يوم ترى مفعولها سحري ما شاءالله ...

وبخصوص الفطريات .. انا كنت استعمل مع بسكت مرهم بشري بس والله نسيت اسمه، طبعا كان بوصف من البيطري و الحمدلله راحت وبعد كنت اسبح بسكت بشامبو نيزورال ..
وبالنسبة للزكام والعطس استعملي مضاد حيوي اسمه بيتاموكس تراه مرة كويس وممكن البيطري يعطيهم ابرة الانفلونزا ..

وممكن تكون حالتهم كذا بسبب نفسي مو عضوي ... حاولي تقضي اطول وقت ممكن معاهم وتلعبيهم و شوفي يمكن يتغير الوضع ...

اتمنى اكون افدتك .. ومايشوفوا شر والله يحفظهم لك ....

[ولد حلو]

هاااي اختي ددي انا حاس انهم يجيبوا الامراض من عيادة البيطري نفسه ،، اكثر البياطره يفحصون قطط مصابه بامراض معديه بدون تعقيم مكان الفحص واحياننا ايديهم نفسها تلعب دور كبير بنقل الامراض خصوصا الفطريه،، بنسبه فقدان الشهيه عندد القطط لها عدة اسباب منها اصابتها بامراض الجهاز التنفسي العلوي والسفلي واهم شي تتذكرين وقت الشاور حقهم ان المويه ابد ماتامس اذانيهم لان اذان القط جدا حساسه من ناحية الفطر في جسم القط ممكن نعالجه في المراهم اللي تستخدم للانسان وهي جدا فعاله اهم شي وقت طلب المرهم اتذكري تطلبي من الصيدلي anti fungal ointment واذا تبغيهم ياكلوا وشهيتهم تنفتح حاولي تعلعبيهم الحركه من الطبيعي تزيد الشهيه وحاولي مثلا تطلعيهم حديقة البيت وتلعبي معهم، اذا كانت مناعتهم جدن ضعيفه ومن الطبيعي انت تكون ضعيفه لانهم ماياكلوا اصلا حاولي تعطيهم حبوب كبد الحوت cod liver oil بس لاتكثري لان القط ممكن يستفرغ يعني حبه وحده باليوم كافيه جربي وقولي لي ايش يصير معك وشكرا

[Black Diamond]

ما شاء الله الله يخليهم لج وطول عمرهم تابعي علاجهم يمكن يصيرون زينين واذا ظلوا على هل الحالة ارميهم في الشارع لانه القطوة اذا مرضت تنقلج العدوى بس ان شاء الله يتشافوون

[*عاشقة القطط*]

الله يشافيهم

والله يقطعون القلب

حاولي انك تخليهم ينامو بغرفه هاديه مره والجو يكون بارد شوي

يعني يستحملوه عشان مايمرضوا زياده او يموتوا

طبعا عشان تنخفظ درجه حرارتهم

ولا تسبحهم عشان ماحيساعد

ولا تأكليهم الاكل امعلب لانه في وقت المرض مابيكون كويس

اذا كنت من جد تحبيهم وتبغيهم يتعافوا وتعتبريهم زي اولادك سوي زي هذا

سويلهم شوربه دجاج بدون بهارات طبعا يعني مرقه مع دجاج طريقة شوربه الدجاج بدون بهارات

ولا خضار

وبدعيلهم انهم يتعافوا يااارب

[dede]

والله ما قصرتو .. ومشكوورين على الردود اللي تهدي القلب

و ان شاء الله راح انفذ كل كلمه قلتوها

و بالنسبه لاكل البيت ... مو راضيين ياكلو ... بس انا راح ااكلهم بالقوه عشان لا يموتو من الجوع

و بالنسبه للامراض ... خلاص انا اتعديت منهم و كل يدي فطريات ... بس عشانهم راح اصبر

[muhannad2]

وانا اقول اختي ديدي في ردها على موضوعي كانت متشائمه

اختي رغم اني ماعرف لقطط
بس انا اعرف للدكاتره

هو يمكن مايعطيها العلاج الازم او يمكن يخدعج علشان تزورينه مره ثانيه ويربح منج فلوس

هذي تفكير الدكاتره الي ماعندهم ضمير
مش معقوله كم مره خذتيهم للعلاج عنده ماصحو وكل مره يمرضون المفروض لو عاج علاج بتلاقين حالتهم تتحسن مش كل يوم شي

بصراحه شي ينشك فيه يعني كل يوم مرض وكل يوم شي بعدين باين من الصور انهم تعبانين

وانصحج تطهرين مكان الاكل والنوم بمطهر ديتول علشان يقتل الجراثيم
انا قبل كان عندي بغبغاء وكل اسبوع اخذه للبيطري نفسه كان يقول لي فيها كوكسيدا تخيلي لما خذيتها للبطيري الثاني قال عندها سلامونيا

شوفي كيف يعني على حسب الطبيب اذا كان شاطر وعنده ضمير بيساعدج