فرخ رمادي دخل حياتي (مع صور)

[TOP-GUY]

السلام عليكم..
مساكم الله بالخير..
ما أدري إذا تخبروني من قبل شهرين تقريباً كنت وإياكم بس انقطعت عن المنتدى لانشغالي, والليلة أرجع لكم.
هذا المنتدى يربط ما بينّا - سواء هواة أو محترفين أو بيطيريين أو حتى مطالعين -, بهذه المخلوقات العجيبة والجميلة; خلفية بسيطة عني:
أبو رياض من الجبيل, هاوي ومربي الكاسيكو (الرمادي الأفريقي), لدي معلومات كثيرة عنه لكن بدون خبرة طويلة, حيث بدأت بتربيته من ثلاثة أشهر.
كان أول رمادي أشتريته عمره حول السنة وثلاثة أشهر, والحمد لله قدرت أروضه -وإن كان مش ولا بد بس أنجزت شيء معه في ظرف أسبوعين _ وقد كتبت تقرير بسيط عن ذلك بهالمنتدى.
بعد شهر من امتلاكي لهذا الطير تعرفت بشخص يمتلك فروخ الرمادي, صغيرة جدا في العمر. واشتريت منه على بركة الله بعد ما بعت الأول تقريبا بنفس السعر فرخ واحد, وسميته ميسون (مادري هو ذكر ولا انثى). طبعا بتسألون قد ايش عمر الفرخ, وأقول لكم عمره يوم شريته ست أسابيع بس (شهر واسبوعين) يعني يأكل بالإبرة, فصفصة وحدة مايقدر عليها. وبصراحة المبلغ كان شوي جامد بس قلت تجربة عمر إن فلحت فلحت وإلا........$^*[#@$%^ألأأ’@#لإي’ ٍءبإ&(+
المهم, عمر ميسون الحين شهرين واسبوعين والحمد لله زي الحلاوة. صحيح فيها شوية معاناة بس الشغلة تستاهل. استفدت من تجاربي مع الرمادي الأول (واللي شوي كبير على التدريب) ومن هالفرخ الصغيرون عفواً ميسون أقصد, حيث أصبح فرداً من العائلة ونحسب حسابه في البيت.
كل أسبوع أصوره وأكتب تقرير بسيط عنه وملاحظاتي عليه, (يمكن تقولون مبالغ بس والله هذا اللي صاير) والله ياجماعة الخير أحبه أحبه هذا الزعنطوط.
وودي يا إخوان اللي عنده شيء عن فروخ الرمادي أنه يشاركنا إياها حيث أني لن أبخل عليكم بشيء, وما جينا هالمنتدى إلا عشان نستفيد من بعض. وأكيد اللي عنده أي استفسار يسأل ولا يتردد وكلنا حاضرين باللي نقدر عليه.
وهذي شوية معلومات عن ميسون:
-كان يالله على خطوة ولا خطوتين ثم يقعد
-شهيته مرة مفتوحة, بس يشوف إبرة الأكل يقوم ينطنط عليها ويصيح.
-لحمه باين من برا ياجماعة الخير
-كان ياكل سريلاك مع خلطة خاصة بمقدار 45 ملم, وكل أسبوع تزيد الكمية 5 ملم. ويعطى بعدها القليل من الماء بالإبرة.
الحين ما شاء الله عليه يفر البيت فر يروح ويجي على كيفه, ويطير بس حق مسافات قصيرة.
يصيح وكل يوم يزيد صراخة ويقوى بعد, وإذا كان رايق يقعد يصفر ويبربر مثل اللي يبي يقول شي بس مو قادر.
مخالبه حادة وعدمت إيديني, ولا أبغى أقصها حتى يكبر شوي ويقوى جسمه والله يصبرنا على جروحه.
ونفس الشي للريش ماودي أقصه حتى يكتمل نموه. (أفكر ما أقصها خير شر)
أليف جداً وطيب (ابن حلال يعني) لاصياح ولا شيء بعض الأحيان أخذه ينام معي بالسرير.
هذا اللي عندي الليلة وآسف جداً على الإطالة بس والله ماودي إلا الخير للجميع والفائدة
وأرفق لكم بعض الصور..
والسلام عليكم..
أبو رياض

[TOP-GUY]

[possessed]

ماشاءالله مبين عليه نظيف وايد

[لحن الخلود]

ابو رياض يعطيك العافيه على النبذه الجميله
وماشاء الله ميسون روعه الله يهنيك به
ولاتحرمنا من مشاركاتك الطيبه

[المنتج]

الغالي ابو رياض :
صحيح زي ماقلت فيها معاناة لكن النتيجة تنسيك التعب
نصيحتي لك لا تقص جناحة.

والله الموفق

[بوفهد]

الله يبارك لك فيها ويعطيك خيرها ويكفيك شرها

بالتوفيق

[FAWAZ]

ماشا الله تبارك الله يابو رياض...... أتمنى لي ولك ولجميع الإخوان هنا بالتوفيق....
بصراحة طائر جميل ... والأجمل إنك أنت من قام بتربيته وهو صغير ...
وان شا الله نستفيد أنا والإخوان هنا من تجاربك معك,,,

وفقكم الله,,,

[تاكو]

ماشاء الله تبارك الله
المهم عدم التفريط فيه

[أبو الجامبو]

أخوي أنا شوي بتلقف
بكم شريته ومن فين ؟؟؟؟؟

[TOP-GUY]

السلام عليكم..

possessed
إيه نعم بس والله متعبني شوي معه, ما يروح محل بالبيت إلا ويترك له (بصمة أو توقيع)

لحن الخلود
ويعافيك بعد وأبشروا باللي أقدر عليه

المنتج
صحيح كلامك, وبالنسبة للجنحان زي ما قلت أفكر ما أقصها بس الخوف أنه يروح وأقعد بها, مو فكة مني بس ممكن يتوه ومايدري وين يروح

بوفهد
ويبارك فيك بعد وترا للحين مدري هو ذكر ولا انثى بس سميته ميسون لانه يركب على الذكر والانثى

FAWAZ
إن شاء الله وأبشروا بالمفيد وباللي أقدر عليه في سبيل الكل يستفيد

تاكو
لاااااا وايش دعوة ماجا إلا بعد ما طلع عيوني

أبو الجامبو
أهلين, تلقف آمر, الطير يالحبيب غالي, تاخذه صغيييييييير وضمانة حياته وسلامته عليك
وتراه فوق الألفين

ومشكورين على تفاعلكم,,,