شريت ببغاء كاسكو

[غزوان Ghzoan]

السلام عليكم

اليوم شريت ببغاء كاسكو ذو الذيل الاحمر

من شفته بالمحل كان ما يصارخ الا قليل حتى من كنت احرك المفتاح قدامه يضل يطالعه ما يصارخ

صاحب المحل قال لي انه عمره 6 اشهر تقريبا

كيف اتأكد ؟لان عينه مو رماديه

دائره سوده كبيره شوي و الاطار اصفر

الان جبته في البيت بس من اقرب عليه يصارخ شوي ومن اجلس جنبه يسكت بس يضل يطالعني

انا ما اعرف وين احطه الحين خليته في غرفتي ومكانه عالي جنب الكمبيوتر

اخله في الصاله؟ خايف يكون ازعاج لان عندنا ولاد صغار

وله اخله في غرفة الضيوف بس مافي حد يدخلها كثير

وله اخليه في غرفتي واخلي اهلي كل فتره يشوفوه

وهو الى الحين مو راضي ياكل شي

ولاحظته يعض في لسانه
ويطلع صوت وشه من بلعومه

طولت عليكم
شكرا لكم

[EVO46]

اخوي لو تحط صورتة علشان نعارف عمرة وتكون واضحة وعن الصوت من بلعومة كيف الصوت هل نفس الشخير اذا نفس الشخير هذا الشي عادي اما عن الاكل اسأل البايع شو كان يأكلة وكيف كان يأكلة هل بالابرة ام بالملعقة ام كان يآكل وحدة

[غزوان Ghzoan]

مو جالس يعطي لي مجال عشان اخذ له صوره بس يصارخ من اقرب عليه كثير

من كان في المحل ما كان كذا

صاحب المحل قال لي يعرف ياكل بروحه

ولاحظت انه ماكل شوي من الخلطه المشكله الي عطاني اياها صاحب المحل
ولتفاح ما ماكل منها شي
_________

بالنسبه لصوت بلعومه نعم نفس صوت الشخير احسه يطلع هل صوت من اقرب عليه اكثر ويضل فتره

والله مو مرتاح من صراخه خايف يكون من النوع الغبي
ورح احاول اصوره لكم تحديدا عيونه

[yooyoo]

مرحبابك اخوي الكريم

اخوي ست شهور ما اضن على حسب كلامك تقلي حولينه عيونه فيه صفار

ولو تحط لنا صور له نقلك ايش نوعه ذكر ولا انثى ونقلك عمره وان شاء الله بنفيدك

بس انا افضل لك انك ما تخلي الاطفال يوحشوه زياده ويرجوه بيتوحش

لاكن ما دام توك مشتريه خليه زي 10 ايام يتفقد البيت حطه على بعد متر او متر ونص خليه من الاعلى يتفقد البيت وكذا بس غير له الماي والاكل

ولاتنسى تحط صور باي طريقه

وموفق ان شاء الله

[غزوان Ghzoan]

تقريبا الاصغار مو مقربين منه لسه يخافو منه بس انا مفكر اخليه بغرفتي

ورح احاول اخذ له صوره
انا حسيت انه غشني لان شفت صفار بعينه بس قنعني وقال لي من يكون الدائره السوده كبيره يعني لسه صغير بحدود 6 الى 8 اشهر

رح تحكمون انتو على الصوره ان شاء الله

والف شكر لك والله تعبتك معي

[غزوان Ghzoan]

بالموت يلا قدرت اصوره شوي

صورته كم صوره قريبه على عينه وفيديو

الفيديو

http://www.youtube.com/watch?v=Kd04LIUc02k

والصور














صوته ذبحني

[EVO46]

أخوي هذا انا اشوفه بحدود السنه او السنة ونص راعي المحل غشك يوم قالك انه عمرة 6 اشهر انا عندي 2 من الكاسكو واحد عمرة سنة ونص نفس مالك بضبط والثاني بيدخل 6 اشهر عيونة رصاصية تبغي نصيحتي روح عند راعي المحل امسكة من رقبتة وخذ فلوسك وخذلك واحد اصغر يعني 8 اشهر او 7 اشهر وعلية حجل فالرجل يكون احسن لنة بيكون وليف من تربية مزارع وتقبل مروري

[غزوان Ghzoan]

والله مدري ما اعتقد رح يرضى لان يمكن ماعنده بعمر 6 اشهر لهذا عطاني هذا

رح اخليه ثلاث ايام اذا بقى يصارخ بهل طريقه ما رح اتحمله صوته مزعج برجع لصاحب المحل لانه اصلا خشني

وحسبي الله ونعم الوكيل بشهر رمضان عشان فلوس وش فيها يعني لو قلي الصراحه

مع اني قلت له هذا شكله كبير قالي لأ 6 اشهر

[stt95]

الإخوان كفو ووفوا وسبقونا بالإجابة

[Mr. Kasico]

بسمه تعالى ...

أخوي .. انا بختصر عليك الطريق كامل وما بطول بالكلام .

أولا الطائر هذا مثل ما قالو لك عمره مو 6 شهور .. ولكن ليس كبير أيضاً .. إلي اشوفه انه مو صفار .. بياض .. طائرك بعمر طائري تقريباً .. وللمعلومة يا الغالي لأنك شكلك جديد بتربية الكاسيكو .. كل الكاسيكو لما توديهم مكان جديد يخافون ويجعرون إذا ماكانو أليفين ومتعلمين على اليد .. والكاسيكو يحتاج صبر طويل مو 3 ايام ولا شهر حتى .. بس طائرك في منتهى الجمال وبما انه كان في المحل عادي هذا دليل انه لما يآخذ على المكان يكون هادي .. ومعناته انتظر عليه شوي وبيتعود على البيت وعلى شكلك .. وبصير احلى مما تتوقع ..

اهم النصائح .. لا تقرب له بسرعة .. دائما تقرب له بهدوء .. لا تحط يدك على القفص عشان لا يخاف .. دائما انت بنفسك إلي غير له الأكل ونظف له القفص .. كلمه بهدوء بدون ما تقرب له وايد او تلمس القفص او تبذر منك حركات مفاجأة تخوفه .. خله على هالحال لمدة 10 ايام وبتلاحظ الفرق .. وصدقني راح تشوف الطير يبتدي يصير طائر ثاني ويعجبك وماتندم لأنك شريته.

والخبراء راح يأكدون لك كلامي .. ترى والله صدقني انا مرة خفت مثلك وتسرعت وخسرت طير في منتدى الروعه والجمال .. والمرة الثانية صبرت وصار الطير احلى مما كنت اتوقع واكو ألحين على يدي ..

ترى بعض الطيور تحتاج حتى 3 شهور عشان تتأقلم بشكل كامل على البيت واصحابها الجدد

ونصيحة مني روح أقرأ المواضيع الخاصة بالببغاء الإفريقي وراح تستفيد جداً . بتلاقي الموضوع مثبت في اول المواضيع إلي بقسم الببغاوات ..

وصدقني بعدين بتحط لنا صورته وهو على يدك وفيديو يتكلم بعد

انا في نظري المشكلة كانت فقط في مصداقية البائع .. لو كان صادق معاك كان افضل .. لكن بالرغم من هذا انت ما نغشيت .. طائرك جميل جداً ونادرا تحصل بهالحلاوة كاسيكو

تحياتي لك